Medıtsınaǵa jańa tehnologııalardy kóptep engizý kerek - Almaz Sharman
Oblys ákimi Altaı Kólginovpen ótken kezdesýde Eýropa men Azııany jalǵastyryp jatqan Batys Qazaqstannyń bolashaǵy talqylandy.
Osy oraıda óńir basshysy oblystyń tynys-tirshiligimen tanystyryp, alda turǵan joba-josparlar jóninde áńgimelep berdi.
Amerıka densaýlyq saqtaý qaýymdastyǵynyń múshesi, Qazaqstan profılaktıkalyq medıtsına akademııasynyń prezıdenti Almaz Sharmannyń aıtýynsha, ınvestıtsııalar tartylsa, kóptegen jobalardy júzege asyrýǵa bolady. Densaýlyq saqtaý, sondaı-aq bilim berý salasynda kadr daıarlaýǵa baılanysty ózekti máseleler joq emes.
Bul rette Oralda medıtsına mamandaryn, oqytýshylardy joǵary tehnologııalar boıynsha oqytý úshin Qazaqstan ǵana emes, Eýropanyń da bilim berý júıesindegi ozyq jetistikterdi paıdalanýǵa bolady. Sonymen qatar halyqqa qyzmet kórsetýde, ınfraqurylymdy damytýda tsıfrlandyrý múmkindikterin qoldana bilgen mańyzdy. Qazirgi tańda oblysta adamdy emhanaǵa neǵurlym tez jetkizý baǵytynda jobalar qolǵa alynýda. Shyndyǵynda da jaraqat alǵan nemese basqalaı qıyn jaǵdaıda qalǵan adamǵa medıtsınalyq kómek ýaqtyly kórsetilýi kerek. Azamattar da óziniń densaýlyǵy týraly habardar bolyp, ózi sheshim qabyldaı bilýi tıis.
Kezdesýde sondaı-aq mektep medıtsınasyn damytý máseleleri sóz boldy. Óıtkeni adam kishkentaıynan óz densaýlyǵyna muqııat qarasa, munyń tıimdiligi joǵary bolmaq.
«Qazaqstanda qazirgi zamanǵy dıagnostıkamen jáne emdeý jabdyǵymen qamtý birshama jaqsy jolǵa qoıylǵan. Degenmen tehnologııalyq elementter, sonyń ishinde kompıýterlik tomografııa, magnıttik-rezonanstyq tomografııa jáne basqalarynyń arasyndaǵy baılanysty retteý úshin ınfrakommýnıkatsııalyq qurylymdy engizgen abzal. Ekinshiden, kóptegen emdelýshiler dıagnozyn anyqtaý úshin shetelge nemese Qazaqstannyń basqa qalalaryndaǵy medıtsına mekemelerine barady. Mine, osyny telemedıtsına, ǵalamtordyń kómegimen retteýge bolady. Mundaı tehnologııany Oral qalasynda tolyq engizýge bolady», - dedi Almaz Sharman.