Medıtsınaǵa qatysty suraqtardy Qoldau 24/7 qosymshasy arqyly joldaýǵa bolady

ALMATY. QazAqparat – Medıtsına máselelerine qatysty suraqtardy qabyldaıtyn Qoldau-24/7 mobıldi qosymshasy iske qosylǵan bolatyn. Osy ýaqyt ishinde turǵyndardan 598 ótinish kelip túsken. Onyń 19-y emdeý mekemeleriniń qyzmetine qatysty shaǵymdanǵan. Bul týraly «Áleýmettik medıtsınalyq saqtandyrý qory» KEAQ Almaty qalalyq fılıaly dırektory Tileýhan Ábildaev aıtty, dep habarlaıdy QazAqparat tilshisi.

Onyń aıtýynsha, qor atalǵan qosymshany azamattardyń mindetti áleýmettik medıtsınalyq saqtandyrý máselelerine baılanysty suraqtaryn qabyldaý maqsatynda iske qosqan. Qazir Qoldau-24/7 qosymshasy tolyqqandy jumys istep tur.

«MSQ azamattardyń medıtsınaǵa qatysty saýaldarynan habardar bolyp, olardy sheshýge septigin tıgizetin baılanys kanaldaryn damytýǵa kúsh salyp jatyr. Keri baılanystyń bul túri qazir óte yńǵaıly. Óıtkeni, turǵyndardyń kóbi baılanys ortalyǵyna habarlasyp, týyndaǵan máseleni operatorǵa túsindirip jatqansha, elektrondy qosymshaǵa jazyp qaldyrǵandy durys kóredi. Turǵyndardyń ótinishteri arnaıy nómirmen tirkelip, máseleniń jaýaby belgilengen ýaqytta shaǵymdanýshynyń qosymshadaǵy akkaýntyna jiberiledi», – dedi fılıal basshysy.

Qosymshany uıaly telefondaǵy App Store jáne Google play arqyly júkteýge bolady. Ótinish nemese shaǵym qaldyrý úshin mindetti túrde tirkelý qajet. Tirkelgen shaǵymdardy Qor mamandary óńdeıdi, tıisti medıtsına uıymdarymen birlesip sheshedi. Saraptama qajet bolǵan jaǵdaıda monıtorıng júrgiziledi.

Sonymen qatar, qosymshada jıi kezdesetin suraqtarǵa arnalǵan bólim bar. Azamattar kópshilikti mazalaıtyn saýaldardyń jaýabyn sol jerden taba alady.

Esterińizge sala ketsek, 2019 jyldyń qyrkúıek aıynda MSQ 1406 biryńǵaı baılanys ortalyǵyn iske qosqan bolatyn. Ortalyq operatorlary MÁMS júıesine qatysty suraqtarǵa jaýap berip, medıtsınalyq qyzmet sapasyna qatysty shaǵymdardy tirkeýmen aınalysady.