Medıtsına uıymdaryna bólinetin qarjy qysqarady degen qaýesetke senbeńizder – qor

ALMATY. QazAqparat - Medıtsına uıymdaryna bólinetin qarjy qysqartyldy degen qaýeset shyndyqqa janaspaıdy. Bul týraly óńirlik kommýnıkatsııalar qyzmetiniń alańynda ótken brıfıngte medıtsınalyq saqtandyrý qorynyń Almaty qalalyq fılıaly dırektory Tileýhan Ábildaev málim etti, dep habarlaıdy QazAqparat tilshisi.

«Sońǵy kezde jurtshylyq arasynda qor medıtsına uıymdaryna bólinetin qarajatty qysqartty, sol sebepti halyqqa kórsetiletin kómek kólemi de qysqardy degen pikir taraǵany jasyryn emes. Bólingen qarjy kólemi jyl saıyn artpasa, kemip jatqan joq. Jalpy, qor - kepildendirilgen tegin medıtsınalyq kómek pen MÁMS sheńberinde halyqqa kórsetilgen qyzmet aqysyn tóleıtin qarjy operatory. ıAǵnı, kelisimshart belgili bir somaǵa bekitiledi, klınıka sol somaǵa jyl boıy qyzmet kórsetedi», - dedi fılıal dırektory.

Aıtýynsha, artyq tutynýdy boldyrmas úshin medıtsına uıymdary kórsetiletin qyzmet kólemin ár aıǵa bólip otyrýy tıis.

Qor kórsetilgen qyzmetterdiń sapasyn tekseredi jáne qyzmet aqysy tıisti monıtorıngten keıin ǵana tólenedi.

«Ádette, monıtorıng barysynda standarttar men normatıvterden aýytqý syndy aqaýlar anyqtalyp jatady. Emdeý mekemelerine aıyppul salynady, kórsetilgen qyzmet somasy tolyǵymen nemese onyń belgili bir bóligi qorǵa qaıtarylady. Al, kórsetilmegen qyzmetti kórsetildi dep qosyp jazǵan klınıkalar úsh ese aıyppul salynady»,- dedi ol.