Medıtsına túlekteri qaı óńirge kóbirek barady – statıstıka

NUR-SULTAN. QazAqparat – QR DSM respýblıkalyq densaýlyq saqtaýdy damytý ortalyǵynyń bas dırektory Qanat Tósekbaev medıtsına túlekterin jumysqa ornalastyrý kórsetkishterin baıandady, dep habarlaıdy QazAqparat tilshisi.

«Medıtsınalyq JOO, ǴZI, ǴO boıynsha 2020 jyly 7 910 maman darıalandy. Aýyldyq kvotany qosa alǵanda, 5 551 túlek memlekettik grant boıynsha oqýdy aıaqtady. Sonymen birge QR «Bilim týraly» zańyna sáıkes, 3 156 adam mindetti jumyspen óteýden bosatyldy. Onyń ishinde 1 735 maman rezıdentýrada, magıstratýrada, doktorantýrada oqýyn jalǵastyrdy, 1 421 maman júktilik, 3 jasqa deıingi bala kútimi, múgedektik boıynsha bosatyldy. Áskerı qyzmet úshin 3 túlektiń oqýy keıinge qaldyryldy. Al 272 jas maman jumysqa jiberilgen ornyna kelgen joq. Memlekettik medıtsınalyq uıymdardaǵy eńbekpen óteý mindettemeleriniń oryndalýyn Bilim jáne ǵylym mınıstrliginiń «Qarjy ortalyǵy» AQ júzege qadaǵalaıdy», - dedi Q. Tósekbaev Ortalyq kommýnıkatsııalar ortalyǵynda ótken onlaın brıfıngte.

Osylaısha 2020 jyly oqý bitirgen 2 054 maman jumysqa ornalasqan.

«Túlekterdi jumysqa ornalastyrý boıynsha eń joǵary kórsetkish Aqtóbe oblysynda tirkeldi, aımaqqa bólingen jas mamandardyń 90% kelgen. Jumyspen óteýden bosatylǵan túlekterdi eskere otyryp, Aqtóbe oblysyna 111 adam jiberilse, 100 jas maman jumysqa ornalasqan. Sondaı-aq, Shyǵys Qazaqstan oblysynda 158 jas mamannyń 138-i (87%), Pavlodar oblysynda – 80 túlektiń 68-i (85%) jumysqa ornalasyp, joǵary kórsetkishke jetken. Al eń tómen kórsetkish Aqmola oblysynda (52%), onda jiberilgen 88 bolashaq medıtsına qyzmetkeriniń 46-sy ǵana barǵan», - dep túsindirdi spıker.

Jalpy praktıka dárigerleri eń suranysqa ıe mamandar bolyp qala beredi, olarǵa respýblıka boıynsha 652 shtattyq oryn tapshylyǵy bar. Anestezıolog-reanımatologtar da eńbek naryǵynda suranysqa ıe, bul mamandar úshin 360,5 shtattyq oryn bos tur.

«Jalpy dárigerlik praktıka» mamandyǵynyń túlekteri bıylǵy tapshylyqty 60%-ǵa qamtýy tıis, al terapevtter men pedıatrlarǵa qajettilik tolyq qanaǵattanýy tıis.

«Biraq anestezıolog-reanımatologtardyń tapshylyǵy joǵary bolyp qalady, óıtkeni túlekterdi jumysqa ornalastyrǵannan keıin de shamamen 80% kadr jetispeýshiligi bolady», - dedi Q. Tósekbaev.

Aıta keteıik, Qazaqstanda 4122 shtattyq orynǵa dárigerler qajet. Ásirese, anestezıolog-reanımatolog, terapevt, jalpy praktıkalyq dáriger, zerthanashy dáriger, akýsher-gınekolog, ınfektsııalyq dárigerler jetispeı jatyr. Ortasha medıtsınalyq qyzmetkerler arasynda 8583 bos shtattyq oryn bar.

Bir jylda elimizde 31 myń mamany jumystan shyǵyp, 1200 maman shetelge ketken.