Medıtsına salasyna qandaı mamandar qajet
Onyń aıtýynsha, sońǵy bes jylda medıtsına mamandaryna degen suranys azaısa da, osy salada maman tapshylyǵy áli de bar. "Jalpy, búginde otandyq medıtsınaǵa 2 900 maman qajet. Sonyń basym bóligi anestezılogııa, reanımatsııa, psıxıatrııa, terapııa, akýsherlik pen gınekologııaǵa tıesili. Dál osy salalar boıynsha qosymsha maman kerek", - dedi Z.Amanjolova joǵary jáne joǵary oqý ornynan keıingi bilimge arnalǵan jıynda.
Depýtattyń sózine qaraǵanda, sporttyq medıtsına, onkoxırýrgııa, radıoxımııa, medıtsınalyq texnıka, ıadrolyq medıtsına men fızıka sııaqty salalarǵa da kásibı mamandar aýadaı qajet. "Maman tapshylyǵy Astana qalasynda, Almaty, Mańǵystaý men Qostanaı oblystarynda barynsha baıqalady", - dep atap kórsetti Z.Amanjolova.
Aıta keteıik, búgingi jıynda negizgi baıandamany QR Bilim jáne ǵylym vıtse-mınıstri Talǵat Eshenqulov jasady. Onyń aıtýynsha, bıyl grant taratý júıesinde birqatar ózgerister bolady. Budan bólek, mektep túlekterine mamandyqty tańdaý jaǵy jeńildeı túsedi. Vıtse-mınıstr qosymsha granttardyń qalaı taratylǵanyn da aıtyp berdi. Al "Serpin" baǵdarlamasynyń granttary ıgerilmeı jatyr.
Al "Aspandaý" ǵylymı-bilim berý qorynyń basshysy Qanat Nurov bilim granttaryn taratý júıesin ózgertýdi usyndy. Onyń aıtýynsha, búginde bilim salasyndaǵy memlekettik tapsyrystyń kólemi eki esege artsa da, kedeı otbasylardan shyqqan balalardyń jartysynan kóbi grant sııaqty qarjylaı qoldaýdy kórip otyrǵan joq. "Sebebi úlken bir problema bar. Qalamen salystyrǵanda aýylda ulttyq biryńǵaı testileýdiń kórsetkishi áldeqaıda tómen bolyp turady. Al aýyldyq kvota 30 paıyzben berilse de, oǵan iligetin jastar neken-saıaq. Óıtkeni testti tapsyra almaı jatqandar kóp. Endi, bul máseleni qalaı sheshý kerek? Menińshe, bilim granttaryn áleýmettik jaǵynan az qamtylǵan, biraq daryndy balalarǵa berý kerek. Ondaı múmkindikti múgedekterge de bergen durys. Ony taza áleýmettik shara dep qabyldamaý qajet. Atalǵan bastama ekonomıkalyq jaǵynan da tıimdi. Sebebi aýyl jastarynda úlken stımýl bar. Olardyń qoǵamda óz ornyn tabýǵa degen yntasy zor", - deıdi Q.Nurov.