«Medıazona» tilshisine ereýilshilerdiń shabýyl jasalǵany habarlandy

NUR-SULTAN. QazAqparat – «Medıazona» resýrsy Almatyda ereýilshiler tilshige shabýyl jasaǵanyn jazdy, dep habarlaıdy QazAqparat tilshisi.

«Almatyda suıytylǵan gaz baǵasynyń kóterilýine baılanysty bastalǵan narazylyq aktsııasyna qatysýshylar «Medıazona» tilshisine qalalyq ákimdik ǵımaratynyń artynda shabýyl jasady.

Tilshi narazylyq bildirýshiler Almaty ákimdiginiń ǵımaratynyń artynda polıtsııa kóligine qol jumsap jatqanyn túsirgen. Toptyń ishinen bir adam tilshiniń qolyndaǵy telefondy qaǵyp túsirgen. Artynsha taǵy eki adam kelip smartfondy tartyp almaq bolǵan. Telefonnyń ekrany búlindi.

Aqyry jýrnalısti jaıyna jibergen. Biraq shabýyl jasaǵandardyń biri oǵan «túrińdi esime saqtadym» dep aıqaılady», - dep jazady «Medıazona».

Eldegi jaǵdaıǵa baılanysty óner adamdary da alańdaýshylyq bildirip, halyqqa basý aıtyp jatyr.

Ardager akter, Halyq ártisi Asanáli Áshimov eldikke úndese, álem tanyǵan dara talant Dımash Qudaıbergen jyraqta issaparda júrgen jerinen sálemin joldady.

«Ardaqty aǵaıyn! Jyraqta issaparda júrip, eldegi bolyp jatqan jaǵdaıdy estip, kóńilim alańdaýly. Týǵan jerim, elim men úshin árqashan qymbat - halqymmen birgemin. Bárimiz úshin eń bastysy - halyqtyń birligi, amandyǵy, eldiń ár azamatynyń áleýmettik jaǵdaıynyń durystyǵy. Narazylyǵyn bildirýge kelgen úlken de kishi de otbasynyń qamy úshin júr. Búginde kúnkóris kún saıyn qymbattap, halyqqa ońaıǵa soǵyp jatqan joq. Halyq sharshady!» dep jazdy Dımash óziniń Instagram paraqshasynda.