Medeýdegi taý baýraıyndaǵy órt tolyq joıylǵan joq – TJD

ALMATY. QazAqparat – 8 mamyr kúni Medeý taýynyń baýraıyndaǵy órttiń taralýy toqtatyldy, degenmen, órt áli tolyq joıylǵan joq. Bul týraly Almaty TJD bastyǵynyń mindetin ýaqytsha atqarýshy Samat Asaınov baspasóz máslıhatynda aıtty, dep habarlaıdy QazAqparat tilshisi.

Spıkerdiń aıtýynsha, qazirgi ýaqytta Іle-Alataý ulttyq parkiniń aýmaǵynda qaraýyldaý, benzoaralardyń kómegimen qulaǵan aǵashtardy kesý, órt oshaqtaryn qazý jáne ranets apparattary arqyly ylǵaldandyrý júrgizilýde. Tańǵy saǵat 7-den bastap bul jumystarǵa TJD-nyń 4 adamy, «Іle-Alataý» MUTP Medeý fılıalynyń 35 qyzmetkeri kúrek, ranetsti órt sóndirgishtermen, benzoaralarmen, «Qazavıaormanqorǵaýdyń»15 qyzmetkeri jumyldyryldy.

«Gorelnık taýy birinshi ret órtengen joq. Esterińizde bolsa, 2011 jyly onda qatty jel soǵyp, saldarynan qulaǵan aǵash, qurǵaq shóp, múkter kóbeıgen. Qazirgi tańda qalyp qoıǵan aǵashtar men tamyrlardy kesý júrip jatyr. Ulttyq park qyzmetkerleri sońǵy qarasora sóndirilgen soń ǵana órt tolyq joıyldy dep aıtýǵa bolatynyn málimdedi. Meniń oıymsha, olar búgin jumys kúniniń sońyna deıin nemese erteń órtti tolyq sóndiredi. Olar bul ýchaskede taǵy da órt bolmaıtynyna tolyq senimdi bolǵan kezde, órttiń tolyq joıylǵany jarııalanady», - dedi Samat Asaınov.

Ol sondaı-aq órttiń shyǵý sebepteri sotqa deıingi tergeý aıasynda anyqtalatynyn aıtty. Aldyn ala málimetter boıynsha, órttiń sebebi ashyq ot kózi boldy (ot jaǵý nemese órteý).

Eske salaıyq, 7 mamyr túngi saǵat 23.00 shamasynda Іle Alataýy memlekettik ulttyq tabıǵı parki Kishi Almaty ormanshylyǵy 33-aýmaǵynan órt shyqqan bolatyn.

Jalynmen kúreske órt sóndirýshiler, birneshe tehnıka men tikushaq jumyldyrylǵan.

Tutanǵan otpen kúres kezinde órt sóndirýshi Arslan Qurmanbekov mert boldy.

Keıin Almaty qalalyq tótenshe jaǵdaılar departamenti qaza tapqan qyzmetker Arslan Qurmanbekovtiń otbasyna 13 mln teńge ótemaqy beriletinin aıtty