Medeýde taǵy bir qutqarýshy jaraqat aldy, órtpen kúres jalǵasýda

ALMATY. QazAqparat - Almaty Tótenshe jaǵdaılar departamentiniń baspasóz qyzmeti Medeýdegi órt týraly egjeı-tegjeı aqparat usyndy, dep habarlaıdy QazAqparat tilshisi.

Vedomstvo málimetinshe, 7 mamyr kúni saǵat 23:52-de Almatynyń Medeý aýdany Іle-Alataý memlekettik ulttyq tabıǵı parkiniń fılıaly, Kishi Almaty ormanshylyǵynyń taý baýraıynda qurǵaq shóp pen qulaǵan aǵashtardyń tutanǵany anyqtaldy. Almaty Tótenshe jaǵdaılar departamentiniń jeke quramynan 59 adam men 15 tehnıka, sondaı-aq parktiń jedel toby dereý jiberildi.

8 mamyr kúni saǵat 01:24-te qyzmettik boryshyn oryndaý kezinde, taý baýraıynda órtti sóndirý barysynda Almaty Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń qyzmetkeri, 7-ÓSB aǵa órt sóndirýshi-qutqarýshysy azamattyq qorǵaý serjanty 1994 jyly týǵan Arslan Qurmanbekov qaza tapty.

Sondaı-aq órtke qarsy qyzmettiń taǵy bir qyzmetkeri Almaty qalasy TJD «Órt sóndirý jáne avarııalyq-qutqarý jumystary qyzmeti» MM Mamandandyrylǵan jasaq bólimshesiniń komandıri azamattyq qorǵaý aǵa serjanty Erik Oqasov qolyna jaraqat aldy.

Qazirgi ýaqytta órt sóndirý jumystary jalǵasyp jatyr.

Órtti sóndirý jerdiń kúrdeli relefimen, qatty jelmen, shóptiń bıik ári qurǵaq bolýymen, qýraǵan aǵashtyń kóp mólsherimen (qulaǵan qurǵaq aǵashtar) kúrdelenýde. Sondaı-aq sý tógetin qurylǵysy bar QR TJM «Qazavıaqutqarý» Mı-171 jáne Mı-8 tikushaqtary jumyldyryldy.

Oqıǵa ornynda órtti joıýǵa «Іle Alataý» MUTP-nyń – 42 jáne TJD-nyń 32 qyzmetkeri, 5 tehnıkasy jumys isteýde.

Órttiń aldyn ala aýdany 3 ga quraıdy. Saǵat 15.13-tegi jaǵdaı boıynsha bıikten 13 ret sý tógildi (39 tonna). Taý baýraıynyń ońtústik-shyǵys bóliginde órttiń taralýyn oqshaýlaýǵa qol jetkizildi.