«Medeý – Shymbulaq» aspajolynda adamdar qalyp qoıdy
Taralǵan vıdeolarǵa súıensek, fýnıkýler aspaly jolda turyp qalǵan. Kabınalarda 2,5 saǵat otyrýǵa májbúr bolǵan týrıster, tek kesh bata tómenge túsirilgen.
Taý shańǵysy kýrortynyń baspasóz qyzmetinen málim etkendeı, 9 jeltoqsan kúni «Medeý – Shymbulaq» aspajoly tehnıkalyq aqaýǵa baılanysty saǵat 16:30 – 17:15 aralyǵynda, ıaǵnı 45 mınýtqa toqtatyldy. Onyń sebebi – aspaly joldyń tehnıkalyq jaı-kúıine monıtorıng jasaıtyn júıedegi aqaý. Ortalyq pýnktige málimetterdiń túsýi toqtaǵannan keıin, aspaly joldyń jumysy da toqtaǵan.
«Toqtaý kezinde «Medeý – Shymbulaq» aspaly jolynda qalyp qoıǵan qonaqtardy túsirý úshin saǵat 17:15-te rezervti rejımge kóshý jáne iske qosý júrgizildi jáne bul «Shymbulaq» taý-shańǵy kýrortynyń tehnıkalyq brıgadasy aqaýdy tolyq joıǵansha jalǵasty. Saǵat 18:30-da aqaý tolyǵymen joıylyp, aspaly jol shtatty rejımde jumysyn jalǵastyrdy», - dedi mekemeden.
Sondaı-aq habarlanǵandaı, osy ýaqyt aralyǵynda aspaly joldaǵy fýnıkýlerǵa otyrý úshin kezekte turǵan týrısterge tegin sháı berilgen. Al dámhanalar óz jumys rejımin uzartqan. Odan bólek, balalary bar qonaqtarǵa «Medeýge» deıin qyzmettik kólikpen transfer uıymdastyrylǵan.
«Osyndaı oqıǵalardyń qaıtalaný qaýpin azaıtý jáne uqsas jaǵdaılar kezinde kýrort qonaqtarynyń dıskomfortyn tómendetý úshin qajetti sharalar qabyldandy. Sonyń ishinde aspaly joldaǵy árbir kabınaǵa shtattan tys jaǵdaılar úshin qutqarý qobdıshalaryn (jamylǵy, ózdigimen qyzdyrylatyn aıaq kıim tósenishi, buzylmaıtyn tiskebasar, dárilik preparattardan: belsendirilgen kómir, qyzý túsiretin, allergııa men dıareıaǵa qarsy dári-dármek, kózge arnalǵan tamshylar) qoıý jumystary júrgizilip jatyr.
Kýrort ákimshiligi keltirilgen yńǵaısyzdyq úshin keshirim suraıdy», - dep qosty mekemeniń baspasóz qyzmetinen.