Medaldar daıyndalatyn metall BQO-dan Reseıge zańsyz shyǵarylmaq boldy

ORAL. QazAqparat – Batys Qazaqstan oblysynda júrgizýshi 23,5 tonna metaldy Reseıge jalǵan qujatpen áketpek bolǵan, dep habarlaıdy QazAqparat tilshisi.

BQO Memlekettik kirister departamentiniń baspasóz qyzmetinen málim etkenindeı, eksporttyq baqylaý qyzmetkerleri «Syrym» avtobeketinde Almatydan Tolıattı qalasyna bet alǵan júk kóligin toqtatqan.

Júrgizýshi bergen ilespe qujatta salmaǵy 23,5 tonna, quny 1,4 mıllıonnan astam teńge turatyn, medal daıyndaýǵa arnalǵan metall dep kórsetilgen. Alaıda, teksergen kezde atalmysh qujat jalǵan, elektrondy shot-faktýralar aqparattyq júıe bazasynda joq bolyp shyqty. Sonymen qatar júk jóneltýshi tek tasymaldaýmen aınalysady, ıaǵnı taýardyń shyǵý tórkinine qatysy joq.

Qazirgi kezde tabysty jasyrý jáne salyqty tóleýden jaltarý maqsatynda zańsyz kásipkerlikpen aınalysqan naqty júk jóneltýshini anyqtaý jumystary júrgizilýde.

Eske sala keteıik, budan buryn Batys Qazaqstanda dárini Reseıge zańsyz shyǵarmaq bolǵan kásiporyn anyqtalǵanyn jazǵan edik.