Májilismender «Ertis ormany» qoryǵynyń máselesimen tanysty
Munda depýtattar ormanshylarmen kezdesip, qoryqtyń aldaǵy órt qaýpi kezeńine daıyndyǵyn tekserdi.
«Ertis ormany» bas dırektorynyń mindetin atqarýshy Qazbek Ametovtyń aıtýynsha, tehnıka parkin jańartý jumysy jalǵasyp jatyr. Atap aıtqanda, 8 traktor satyp alyndy.
– Biz Býrabaı parkinen keıin ekinshi bolyp, erte anyqtaý júıesin ornattyq. Bıyl sáýir aıynan bastap 23 beınebaqylaý munarasy iske qosyldy. Onyń keıbiri aqparatty ınternet arqyly emes, telefon jelisi arqyly jiberedi. Máselen, 70 órt oshaǵynyń 50-i osy kameralar arqyly anyqtaldy. Qyzmetkerlerdi jańa tehnıkamen qamtamasyz etý jumysyn jalǵastyrý – asa mańyzdy, – dedi ol.
Óz kezeginde, «Ertis Ormany» orman sharýashylyǵyn qorǵaý qyzmetiniń bólim basshysy Qobylandy Atyǵaev byltyr ormanshylardyń jalaqysy óskenimen, osy salada jumys isteıtin júrgizýshiler men órt sóndirýshilerdiń eńbekaqysy joǵarylamaǵanyn aıtty.
– Sala ardagerleri birtindep zeınetke shyǵyp jatyr. Al jastar qaýymy bizge jumys isteýge kelmeıdi. Júrgizýshiler, traktorshylar, tazalaýshylar jáne ózge de jumysshylar azamattyq qyzmetkerler sanatyna jatpaıdy. Buǵan qosa, olar aýyldyq jerde jumys istegeni úshin 25 paıyz ústemeaqy da ala almaıdy. Olardyń medıtsınalyq járdemaqysy joq. Jalaqysy tómen jumys oryndarynda adamdar uzaq ýaqyt eńbek etpeıdi, – dedi ol.
Bul rette, Májilis depýtaty Nurjan Áshimbetov Memleket basshysynyń tapsyrmasy boıynsha 2023 jylǵy 1 shildeden bastap tek órt sóndirýshilerdiń jalaqysy kóterilgenin túsindirdi. Bolashaqta tehnıkalyq personaldyń jalaqysyn 2 ese ósirý qajet.
– Bizdiń maqsat-mindetimiz – qaıǵyly oqıǵalardan sabaq alyp, jaǵdaıdyń qaıtalanýyna múldem jol bermeý. Tıisti jumys júıeli júrgizilýde. Jabdyqtardy jańartý máselesi de nazardan tys qalǵan joq. Orman sharýashylyǵy mekemelerin tolǵandyrǵan bul másele ónerkásipti damytý qory usynatyn 3 paıyzdyq lızıng arqyly sheshiledi, – dedi depýtat.
Al depýtat Vera Kımniń aıtýynsha, orman sharýashylyǵy salasyna kadr tartý úshin «Dıplommen aýylǵa» syndy túrli memlekettik baǵdarlamalar usynatyn múmkindikterdi paıdalaný qajet.
– Orman sharýashylyǵy beıinine sáıkes keletin joǵary oqý oryndaryn támamdaǵan jas mamandar shalǵaıdaǵy orman sharýashylyqtaryna jumysqa ornalasýǵa asyqpaıdy. Sebebi olarǵa baspana men jaıly ómir súrý jaǵdaıyn usynatyn múmkindik joq. Kadrlardy ustap qalý úshin salada jumys istep jatqan jergilikti jas mamandarǵa jáne jalpy jastarǵa aýdan ákimdikterinen aýdanda suranysqa ıe mamandyqtar boıynsha bilim berý granttaryn usyný, biliktilikti arttyrý kýrstaryn uıymdastyrý, kóterme járdemaqy tóleý, turǵyn úı, jumys ornyn usyný tájirıbesin keńeıtý qajet, – dedi ol.
Aıta keteıik, buǵan deıin depýtattar Ekibastuz qalasyna jumys saparymen baryp, jylý jelilerin qaıta qurý jáne JEO jóndeý jumysynyń barysymen tanysty. Sonymen qatar, májilismender Baıanaýyl, Ýspen, Tereńkól jáne ózge de aýdandardyń turǵyndarymen birqatar kezdesý ótkizdi.