Májilis jańartylatyn energııa kózderin damytýǵa qatysty qujatty maquldady

<p>ASTANA. KAZINFORM &ndash; Búgin Májilistiń jalpy otyrysynda &laquo;Qazaqstan Respýblıkasynyń keıbir zańnamalyq aktilerine jańartylatyn energııa kózderin paıdalanýdy qoldaý, elektr energetıkasy jáne tabıǵı monopolııalar máseleleri boıynsha ózgerister men tolyqtyrýlar engizý týraly&raquo; zań jobasy birinshi oqylymda maquldandy.</p>

Zań jobasynyń maqsaty – halyqtyń, shaǵyn jáne orta bıznestiń jańartylatyn energııa kózderin paıdalaný salasyndaǵy problemalaryn sheshý, sondaı-aq Qazaqstan Respýblıkasy Memleket basshysynyń 2021 jylǵy 26 mamyrdaǵy elektr energetıkasy salasyn damytý máseleleri jónindegi keńeste bergen tapsyrmasyn oryndaý.

Qujat aıasynda Kásipkerlik kodekske, «Qazaqstan Respýblıkasyndaǵy kedendik retteý týraly» Qazaqstan Respýblıkasynyń Kodeksine jáne «Elektr energetıkasy týraly», «Jańartylatyn energııa kózderin paıdalanýdy qoldaý týraly» jáne «Tabıǵı monopolııalar týraly» zańdarǵa túzetýler eskerilgen.

«Atap aıtqanda, «Jańartylatyn energııa kózderin paıdalaný boıynsha shaǵyn aýqymdaǵy obekt» degen termıni engizildi. Bul norma jańartylatyn energııa kózderiniń shaǵyn generatsııasynyń mártebesin neǵurlym naqty aıqyndaýǵa jáne ony jańartylatyn energııa kózderiniń iri kommertsııalyq bıznes-jobalarynan ajyratýǵa múmkindik beredi. Ekinshiden, jańartylatyn energııa kózderiniń shaǵyn aýqymdaǵy obektileriniń eń joǵary qýaty 200 kVt deıin ulǵaıtyldy. Túzetý iri bólshek tutynýshylarǵa ózderiniń shaǵyn aýqymdy jańartylatyn energııa kózderiniń obektisi esebinen elektr energııasyna degen óz muqtajyn barynsha qamtamasyz etýge múmkindik beredi», - dedi Májilis depýtaty Dúısenbaı Turǵanov.

Onyń aıtýynsha, netto-tutynýshy jeke tulǵalar dara kásipker retinde tirkelý mindetinen bosatylady. Bul tolyqtyrý azamattardyń jańartylatyn energııa kózderiniń shaǵyn aýqymdaǵy obektilerin paıdalaný protsesindegi bıýrokratııany aıtarlyqtaı azaıtady jáne tirkeýshi organdarmen ózara is-qımyl jasaý qajettiligin bolǵyzbaıdy.

«Energııa berýshi uıymdardyń elektr jelilerine netto-tutynýshylardyń erkin qol jetkizýin jáne qosylýyn qamtamasyz etý mindeti bekitilgen. Norma energııa berýshi uıymdar tarapynan bolatyn qarsy is-qımyldan netto-tutynýshylardyń múddelerin quqyqtyq qorǵaý tásilderin keńeıtýge baǵyttalǵan. Budan bólek, netto-tutynýshylar elektr energııasyn berý qyzmetterine aqy tóleýden bosatylady, bul qosymsha jáne negizsiz shyǵyndardyń bolmaýyna múmkindik beredi», - dedi depýtat.

Onyń paıymynsha, zań jobasyn qabyldaý kúndelikti ómirde jańartylatyn energııa kózderin belsendi engizýge, qyzmet kórsetýdiń perspektıvaly jańa baǵytyn damytýǵa, jańa jumys oryndaryn qurýǵa, jelilik ınfraqurylymdy odan ári evolıýtsııalyq damytýǵa, eldiń energetıka sektoryna ınvestıtsııalar tartýǵa yqpal etedi.