Májilis zaǵıptarǵa qolaıly jaǵdaı jasaý týraly zańdy qabyldady
- Bul zań zaǵıptar men kórý qabileti buzylǵan adamdardyń baspa aqparatyn qabyldaýyn jeńildetý maqsatynda ázirlengen. Marrakesh sharty 2013 jylǵy 27 maýsymda Marokkoda Dúnıejúzilik zııatkerlik menshik uıymynyń (DZMU) dıplomatııalyq konferentsııasynda qabyldandy. Shart kórý qabileti nashar adamdarǵa arnalǵan ádebı jáne kórkem shyǵarmalarǵa qol jetkizýdi jeńildetýge baǵyttalǵan. Sharttyń maqsaty - kedergilerdi joıý jáne bilim men jarııalanǵan týyndylarǵa teń qol jetkizýdi qamtamasyz etý. Qujat ýaǵdalasýshy taraptardan zaǵıp jáne nashar kóretin adamdar úshin qolaıly formattarda jarııalanǵan týyndylardy (Braıl; aýdıoformat; beıimdelýi bar elektrondy kitaptar, ıaǵnı mátindi aýdıoǵa jáne iri qaripke aýdarý múmkindigi) jańǵyrtýǵa, taratýǵa jáne kópshilikke qoljetimdi etýge múmkindik berý úshin avtorlyq quqyqtarǵa qatysty shekteýler men erekshelikterdiń standartty jıyntyǵyn eskerýdi talap etedi, - dedi Ádilet mınıstri Azamat Esqaraev.
Onyń aıtýynsha, bıylǵy 26 sáýirde Májilistiń qaraýyna túsken zııatkerlik menshik máseleleri boıynsha keıbir zańnamalyq aktilerge ózgerister men tolyqtyrýlar engizý týraly zań jobasyna tıisti túzetýler kózdelgen.
- Eńbek jáne halyqty áleýmettik qorǵaý mınıstrliginiń resmı derekterine qaraǵanda, elimizde 85 myńnan astam adamnyń kórý qabileti boıynsha múgedektigi bar. Shartty ratıfıkatsııalaý osy adamdardyń kitaptarǵa, jýrnaldarǵa, oqý materıaldaryna emin-erkin qol jetkizýin keńeıtýge múmkindik beredi. Marrakesh shartyn ratıfıkatsııalaý zaǵıptar men kórý qabileti buzylǵan adamdar úshin kitaphanalar jelisiniń saqtalýyn qamtamasyz etýge yqpal etedi, - dedi mınıstr.
Buǵan deıin habarlanǵandaı, jaqynda Berdibek Soqpaqbaevtyń zaǵıp jandarǵa arnalǵan kitabynyń tusaýkeseri ótti.