Májilis túrki memleketteri arasyndaǵy júk tasymaly kelisimin ratıfıkatsııalady
«Sizderdiń qaraýyńyzǵa Túrki memleketteri uıymyna múshe memleketterdiń úkimetteri arasyndaǵy halyqaralyq quramdastyrylǵan júk tasymaldary týraly kelisimdi ratıfıkatsııalaý jónindegi zań jobasy usynylady. Kelisim, ártúrli kólik túrlerin paıdalana otyryp, halyqaralyq júk tasymaldaryn jeńildetýge, sondaı-aq Túrki memleketteri uıymyna múshe memleketter arasyndaǵy tranzıttik jáne saýda-ekonomıkalyq yntymaqtastyqty damytýǵa baǵyttalǵan», - dedi Kólik mınıstri Marat Qarabaev Májilistiń jalpy otyrysynda.
Ótken jyldyń qorytyndysy boıynsha Qazaqstan men Túrki memleketteri uıymyna múshe memleketter arasyndaǵy júk tasymaldaý kólemi 35 mln tonnaǵa jetken.
«Kelisimdi qabyldaý Qazaqstan arqyly tranzıttik júk tasymaldaý kólemin odan ári arttyrý úshin alǵysharttar jasap, eldiń kólik-tranzıttik áleýetin damytýǵa oń áserin beredi. Kelisimniń normalaryn iske asyrý maqsatynda Túrki elderi arasyndaǵy tasymaldaýdy damytý jónindegi birlesken komıtet qurylady. Zań jobasyn qabyldaý respýblıkalyq bıýdjetten qosymsha qarjylyq shyǵyndardy qajet etpeıdi jáne teris áleýmettik-ekonomıkalyq saldarlarǵa ákelip soqpaıdy», - deıdi ol.