Májilis tóraǵasy elimizde sheshilmeı jatqan máselelerdi atady
«Saılaýshylardyń problemalaryn sheshý jumysy josparly túrde júrgizilip jatqanyn kórip otyrmyz. Muny da aıtyp ótý kerek. Sonymen qatar, sheshilmegen máseleler de bar. Bul jaıynda búgin depýtattar, fraktsııa jetekshileri sóılegen sózderinde aıtty. Úkimet osy jaıttarǵa erekshe nazar aýdarýy kerek. Shaǵyn mektepter, úsh aýysymdy jáne avarııalyq kúıdegi mektepter problemasyn sheshý qajet. Densaýlyq saqtaý salasyn qarjylandyrý tetikteri jete pysyqtalmaǵan. Jylý elektr ortalyqtaryna qatysty sheshilmegen máseleler bar. Óńirlerde olardyń 80 paıyzǵa jýyǵy tozǵan. Sýmen jabdyqtaý máselesinde de jaǵdaı osyndaı», - dedi E. Qoshanov.
Onyń paıymynsha, aýyl sharýashylyǵy qajettiligi úshin sýmen jabdyqtaý jáne azamattardy taza aýyz sýmen qamtamasyz etý jaıy asa máz emes. Únemi kóterilip júrgen, úlken problemanyń taǵy biri – joldardyń ahýalyna qatysty. Jalpy, bul aıtylǵan problemalar bıyl ǵana paıda bolyp otyrǵan joq.
«Olardy sheshý úshin júıeli, turaqty sharalar qabyldaý qajet. Qordalanǵan osy problemalardy ýaqtyly sheshý – halyqtyń ómir súrý sapasyna tikeleı áser etetinin esten shyǵarmaýymyz kerek. Al azamattardyń ál-aýqatyn arttyrý – Úkimettiń, jergilikti atqarýshy organdar men depýtattardyń, ıaǵnı bizdiń ortaq mindetimiz. Úkimet depýtattar aıtqan barlyq usynysty eskerip, nazarǵa alýǵa tıis. Jalpy, saılaýshylardyń ózekti máseleleri boıynsha Úkimettiń jarııa esebi tıimdiligin kórsetti. Sondyqtan mundaı jumys formatyn keleshekte jalǵastyratyn bolamyz. Ótken sessııada Joǵary aýdıtorlyq palata tóraǵasynyń sý máseleleri jónindegi, sondaı-aq kólik salasyna qatysty esebin eki ret tyńdadyq. Osylaısha, jańa konstıtýtsııalyq normanyń arqasynda depýtattar respýblıkalyq bıýdjettiń atqarylýy sapasyna parlamenttik baqylaýdy kúsheıtti», - dedi Májilis tóraǵasy.
Sonymen qatar ol osy parlamenttik sessııany qorytyndylady.
«Áriptester, parlamenttik sessııa aıaqtaldy. Biraq, bul tek zań qabyldaý jumysynda ǵana eki aı úzilis bolatynyn bildiredi. Al depýtattardyń qyzmeti jalǵasa beredi. Óńirlerge baryp, jurtshylyqpen júzdesetin bolamyz. El Prezıdenti depýtattardyń óńirlerge baryp jumys isteýi mańyzdy ekenin atap ótti. Saılaýshylardyń muń-muqtajyn óz aýzynan tyńdap-bilý – bizge berilgen zor múmkindik. Bolashaqta munyń bári jańa zańnamalyq bastamalar men depýtattyq saýaldarǵa negiz bolady. Sizderge sessııa barysynda nátıjeli jumys istegenderińiz úshin raqmet aıtqym keledi. Birlese jumys atqarǵany úshin Úkimetke taǵy da alǵys aıtamyn. Jumysymyzdy obektıvti túrde jarııalap-kórsetken buqaralyq aqparat quraldary ókilderine de erekshe rızashylyq bildiremin», - dedi Erlan Qoshanov.