Májilis syrtqy saýdaǵa qatysty zańdy qabyldady

<p>Búgin Májilistiń jalpy otyrysynda 2014 jylǵy 29 mamyrdaǵy Eýrazııa ekonomıkalyq odaǵy týraly shartqa ózgerister engizý týraly hattamany ratıfıkatsııalaıtyn zań qabyldandy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Hattamaǵa 2022 jylǵy 31 naýryzda Máskeý qalasynda qol qoıyldy.

«Eýrazııalyq ekonomıkalyq odaq týraly shartqa barlyǵy 106 túzetý engiziledi. Túzetýler tehnıkalyq retteýge, veterınarııalyq-sanıtarııalyq jáne fıtosanıtarııalyq sharalarǵa, makroekonomıkalyq saıasatqa, kólikke, janama salyqtar salýǵa, syrtqy saýda saıasatyna qatysty. Birinshiden, EAEO-ǵa múshe basqa memlekettegi pedagogıka jáne zańger qyzmeti boıynsha qyzmetkerler úshin bilim týraly qujattardy rastaý talaptary alynyp tastalady. Bul osy sanattaǵy eńbek mıgranttarynyń erkin qozǵalýyna múmkindik beredi. Ekinshiden, Eýrazııalyq ekonomıkalyq odaq organdary qabyldaǵan aktileriniń is júzindegi áserin baǵalaýdy júrgizý mehanızmi engizilip jatyr. Qazir EAEO organdary aktileriniń jobalaryna retteýshi áserdi baǵalaý ǵana júrgizilip otyr. Mundaı aktilerdi qabyldamas buryn, aldynda olardyń bızneske qandaı da bir áseri baǵalanady. Jańa tetik Komıssııanyń qabyldanǵan sheshimderine qatysty is júzindegi áserdi baǵalaıdy. Qajet bolǵan jaǵdaıda, qoldanystaǵy sheshimdi qaıta qarap, ózgerister jasaýǵa qorytyndy bere alady», - dedi Saýda jáne ıntegratsııa mınıstri Arman Shaqqalıev.

Sonymen qatar ol dempıngke qarsy qaıta tergeý mehanızmi eskerilgenin aıtty.

Dempıngke qarsy sharalar arzan ımportqa áser etpese, qaıta tergeý jumystary qarastyrylady.

«Munymen qosa, básekelestik qaǵıdalaryn saqtaý salasynda Komıssııa sheshimderin oryndamaǵan jaǵdaıda, aıyppul engizý eskerilgen. Budan bólek, fıtosanıtarııalyq sertıfıkattar men memlekettik tirkeý týraly kýálikterdi elektrondyq túrde resimdeý múmkindigine jol beriledi. Buryn tek qaǵaz júzinde ǵana múmkin bolatyn. Sonymen qatar, «ónimniń shyqqan jerinen dúken sórelerine» deıingi jemis pen kókónisterdiń taýarlar partııasyn tsıfrlyq qadaǵalaý mehanızmi engizilip jatyr. Oǵan biz ulttyq aqparattyq júıeler arqyly kiretin bolamyz. Barlyq aqparat elektrondy túrde bolǵandyqtan, bizdiń kásipkerlerdiń ónimderine Eýrazııalyq ekonomıkalyq odaqtyń Fıtosanıtarııalyq organdarynyń senimi artatyn bolady», - dedi mınıstr.