Májilis KSRO kezindegi ónertabystar qupııasyn qamtamasyz etý týraly kelisimniń qoldanysyn toqtatty
Ónertabystardy quqyqtyq qorǵaý salasynda memleketaralyq qupııalardyń saqtalýyn ózara qamtamasyz etý týraly kelisimge TMD Úkimet basshylary 1999 jylǵy 4 maýsymda Mınsk qalasynda qol qoıdy jáne ol 2001 jylǵy 7 mamyrdaǵy Qazaqstan Respýblıkasynyń Zańymen ratıfıkatsııalandy.
«Kelisim KSRO-nyń ydyraýyna jáne sonyń negizinde derbes memleketterdiń qurylýyna baılanysty, TMD-ǵa qatysýshy memleketterdegi qupııa ónertabystar týraly málimetterge qatysty qupııalylyq rejımin qamtamasyz etý, burynǵy KSRO-da jasalǵan qupııa ónertabystardy quqyqtyq qorǵaý ári olardy qupııasyzdandyrý tártibin belgileý maqsatynda ázirlendi», - delingen Májilistiń Zańnama jáne sot-quqyqtyq reforma komıteti málimetinde.
Ádilet mınıstri Azamat Esqaraevtyń aıtýynsha, kelisimniń TMD-ǵa qatysýshy memleketterde qoldanylý merziminiń barlyq kezeńinde KSRO-da jasalǵan qupııa ónertabystarǵa qorǵaý qujattaryn berýge birde-bir ótinish berilmegen. Sondaı-aq, qupııa ónertabystardy qupııasyzdandyrýdyń birde-bir jaǵdaıy tirkelmegen.
«Sonymen qatar, ónertabystardy qorǵaý merzimi 20 jyldy quraıtynyn atap ótken jón. Qazir KSRO-da jasalǵan barlyq ónertabystar boıynsha qorǵaý qujattarynyń áreket etý merzimi ótip ketti. Osyǵan baılanysty TMD Atqarýshy komıteti Kelisim mańyzdylyǵynyń joqtyǵyna baılanysty onyń qoldanysyn toqtatý týraly másele kóterdi. Qazaqstan Respýblıkasy Kelisimniń qoldanysyn toqtatý týraly hattamaǵa 2020 jylǵy 8 jeltoqsanda qol qoıdy. Kelisimniń qoldanysyn toqtatý týraly hattamany ratıfıkatsııalaý týraly Zańyn qabyldaý teris áleýmettik-ekonomıkalyq nemese quqyqtyq saldarǵa ákep soqpaıdy jáne memlekettik bıýdjetten qosymsha shyǵystardy talap etpeıdi», - mınıstr.