Májilis Qazaqstan men Qatardyń ınvestıtsııalyq yntymaqtastyǵy týraly zańdy qabyldady
Kelisimge 2022 jylǵy 12 qazanda Astanada qol qoıyldy.
«Qazirgi kúrdeli geosaıası jáne geoekonomıkalyq jaǵdaılarda sheteldik ınvestıtsııalardy tartý máselesi kez kelgen memlekettiń ekonomıkalyq damýy úshin eń ózekti máselelerdiń biri sanalady. Qazaqstan Respýblıkasynyń Prezıdenti Qasym-Jomart Kemeluly Toqaev pen Qatar Ámiri sheıh Tamım ben Hamad ál-Tanıdiń turaqty baılanystary Qazaqstan men Qatar arasyndaǵy ózara is-qımyldyń joǵary serpinin qamtamasyz etip otyr. Elder arasyndaǵy ekonomıkalyq qatynastardyń aıtarlyqtaı nyǵaıýyn eskere otyryp, eki eldiń ınvestorlaryn qorǵaý jáne qoldaý maqsatynda Qazaqstan Respýblıkasynyń Úkimeti men Qatar Memleketiniń Úkimeti arasyndaǵy Investıtsııalardy kótermeleý jáne ózara qorǵaý týraly kelisim jasaldy», - dedi Syrtqy ister mınıstriniń orynbasary Nazıra Nurbaeva.
Atalǵan Kelisim ekonomıkalyq yntymaqtastyq jáne damý uıymynyń standartty qaǵıdalary, ıÝNKTAD prıntsıpteri jáne Dúnıejúzilik banktiń usynystary negizinde jasaldy.
«Bul qujat eki memleket aýmaǵynda ınvestıtsııalyq qyzmetti júzege asyrý kezinde ınvestorlardyń halyqaralyq quqyqtyq kepildikterin qamtamasyz etýge baǵyttalǵanyn atap ótý qajet. Kelisim ınvestıtsııalyq qyzmetti júzege asyrý kezinde ınvestorlardyń quqyqtarynyń kepildikterin qamtamasyz etý arqyly yntymaqtastyqtyń quqyqtyq negizin quryp otyr. Bul rette, ınvestıtsııalyq ahýaldy jaqsartýǵa jáne elder arasyndaǵy ózara tıimdi saýda-ekonomıkalyq yntymaqtastyqty odan ári damytýǵa jaǵdaı jasalady. Qujat ratıfıkatsııalanǵan jaǵdaıda ony iske asyrý teris áleýmettik-ekonomıkalyq nemese quqyqtyq saldarǵa ákep soqpaıdy jáne respýblıkalyq bıýdjetten qosymsha qarjylyq shyǵyndardy talap etpeıdi», - dedi mınıstrdiń orynbasary.