Májilis qaryz alýshylardyń quqyǵyn qorǵaıtyn zańǵa Senat engizgen túzetýlermen kelisti
Májilis depýtaty Berik Beısenǵalıevtiń aıtýynsha, Senat engizilgen túzetýler tutastaı alǵanda qarjy naryǵyn retteýdi jetildirýge baǵyttalǵan jáne kelesi máselelerdi qarastyrady:
— Qazaqstan Respýblıkasy Qarjy naryǵyn retteý jáne damytý agenttiginiń qyzmetin respýblıkalyq bıýdjet shyǵystarynyń quramynan qarjylandyrýdy alyp tastaý jáne Qazaqstan Respýblıkasy Ulttyq bankiniń bıýdjetinen qarjylandyrýǵa kóshý;
— áskerı qyzmetshilerge merzimdi qyzmet ótkergennen keıin 60 kúnge banktik qaryz nemese mıkrokredıt boıynsha tólemderdi qosymsha keıinge qaldyrýdy usyný;
— sındıkattalǵan qarjylandyrýǵa qatysýǵa quqyǵy bar tulǵalardyń tizbesin keńeıtip, Qazaqstan Respýblıkasynyń beırezıdent-bankteriniń fılıaldaryn, «Astana» halyqaralyq qarjy ortalyǵynyń bankterin engizý;
— qarjy uıymynyń basshy laýazymyna kandıdatty kelisý kezinde Ulttyq basqarýshy holdıngtiń, Qazaqstannyń Damý Bankiniń, jeke kásipkerlikti damytýdyń arnaıy qorynyń basshy laýazymdaryndaǵy jumys ótilin eskerý;
— kollektorlyq agenttikterdiń kredıttik bıýroǵa bereshekti retteý jónindegi málimetterdi usyný mindetin engizý;
— zańnyń taqyrybyn jáne jekelegen jańa erejeleriniń qoldanysqa engizilý merzimin ózgertý.
«Osy aıtylǵandardy eskere otyryp, Qarjy jáne bıýdjet komıteti „Qazaqstan Respýblıkasynyń keıbir zańnamalyq aktilerine kredıt berý kezinde táýekelderdi barynsha azaıtý, qaryz alýshylardyń quqyqtaryn qorǵaý, qarjy naryǵyn retteý jáne atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly“ Qazaqstan Respýblıkasynyń Zańyna Qazaqstan Respýblıkasy Parlamentiniń Senaty engizgen ózgeristermen jáne tolyqtyrýlarmen kelisýge bolady dep esepteıdi», — dedi depýtat.