Májilis kapıtaldy baqylaýdy kúsheıtýge arnalǵan zańdy qabyldady

<p>ASTANA. KAZINFORM &ndash; Búgin Májilistiń jalpy otyrysynda &laquo;Qazaqstan Respýblıkasynyń keıbir zańnamalyq aktilerine transferttik baǵa belgileý máseleleri boıynsha ózgerister men tolyqtyrýlar engizý týraly&raquo; Zańy ekinshi oqylymda qaraldy. Talqylaýdan keıin depýtattar qujatty qabyldady.&nbsp; &nbsp;</p>

2023 jylǵy 13 jeltoqsanda Parlament Májilisiniń jalpy otyrysynda zań jobasy birinshi oqylymda tujyrymdamalyq turǵyda maquldandy. Qujat Memleket basshysynyń 2020 jylǵy 1 qyrkúıektegi Qazaqstan halqyna Joldaýyn iske asyrý jónindegi jalpyulttyq is-sharalar josparynyń 37-tarmaǵynyń oryndalýyn zańnamalyq turǵydan qamtamasyz etýge baǵyttalǵan. Ony ázirleýdiń maqsaty – Qazaqstan Respýblıkasynyń transferttik baǵa belgileý salasyndaǵy zańnamasyn jetildirý jáne transferttik baǵa belgileý men kapıtaldy elden shyǵarýdy baqylaý sharalaryn kúsheıtý.

Zań normalaryn iske asyrý halyqaralyq iskerlik operatsııalarda jáne halyqaralyq iskerlik operatsııalarmen baılanysty kelisimsharttarda memlekettik kiristiń joǵalýyn boldyrmaýǵa oń áser etedi.

«Májiliste atqarylǵan jumysqa oralatyn bolsaq, jalpy zań jobasy boıynsha jumys tobyna 30-ǵa jýyq usynys kelip tústi. Barlyq usynystar múddeli memlekettik organdar, «Atameken» Ulttyq kásipkerler palatasy, salalyq qaýymdastyqtar, sondaı-aq kommertsııalyq uıymdar ókilderiniń qatysýymen jumys tobynyń jáne Qarjy jáne bıýdjet komıtetiniń keńeıtilgen otyrystarynda qaraldy», - dedi Májilis depýtaty Ádil Jubanov.