Májilis geologııalyq barlaýǵa qatysty zańǵa Senat engizgen túzetýmen kelisti
«Qaralyp otyrǵan zańǵa Parlament Senatynyń depýtattary birqatar naqtylaý túzetýlerin engizdi. Bul rette, 2023 jylǵy 31 jeltoqsanǵa deıin jasalǵan sharttar men berilgen lıtsenzııalar boıynsha Memlekettik komıssııanyń fýnktsııalaryn saqtaý eskerilgen. Sonymen qatar, paıdaly qatty qazbalardyń resýrstary men qorlaryn baǵalaý týraly esepte jer qoınaýy jáne jer qoınaýyn paıdalaný týraly málimetterdi jasyratyn nemese jalǵan málimetter beretin adamdar úshin jaýapkershilik belgilengen. 26 jeltoqsanda Májilistiń Ekologııa máseleleri jáne tabıǵat paıdalaný komıtetiniń keńeıtilgen otyrysynda Senattyń túzetýleri talqylanyp, biraýyzdan qoldaý jasaldy. Osy rette, bizdiń komıtet atalǵan zańǵa Senat engizgen túzetýlermen kelisýdi usyndy», - dedi Májilis depýtaty Edil Jańbyrshın.
Jalpy otyrysta palata depýtattary osy usynysqa qoldaý bildirdi.
Budan buryn habarlanǵandaı, jaqynda Senattyń jalpy otyrysynda «Qazaqstan Respýblıkasynyń keıbir zańnamalyq aktilerine jer qoınaýyn paıdalaný jáne ekologııa máseleleri boıynsha ózgerister men tolyqtyrýlar engizý týraly» Zańy ekinshi oqylymda qaraldy. Senat zańnyń jekelegen baptaryn jańa redaktsııada usynyp, ony Májiliske qaıtardy.
«Zańdy Qazaqstan Respýblıkasy Parlamentiniń Senatynda qaraý barysynda geologııalyq barlaýǵa ınvestorlardy tartý maqsatynda jańa ken oryndary úshin KazRC halyqaralyq standarttaryn endire otyryp, 2024 jylǵy 1 qańtarǵa deıin jasalǵan jáne berilgen paıdaly qatty qazbalardy óndirýge arnalǵan kelisimsharttar men lıtsenzııalar úshin ǵana Paıdaly qazbalar qorlary jónindegi memlekettik komıssııanyń jumysyn saqtaý bóliginde túzetýler engizildi», - delingen Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetinde.