Májilis Eýropa damý bankine qatysty qujatty qabyldady

<p>ASTANA. KAZINFORM &ndash; Búgin Parlament Májilisiniń jalpy otyrysynda &laquo;Eýropa Qaıta Qurý jáne damý bankin qurý týraly kelisimniń 1-babyna bank operatsııalaryn geografııalyq qamtýdy Saharanyń ońtústigine qaraı Afrıka elderine jáne Irakqa shekteýli jáne birtindep taratýdy júzege asyrýǵa múmkindik beretin túzetýlerdi ratıfıkatsııalaý týraly&raquo; Zańy qabyldandy.</p>

«Eýropa Qaıta Qurý jáne damý bankiniń quramynda qazir 72 el men 2 uıym bar, sondyqtan ol halyqaralyq qarjy uıymy sanalady. Banktiń negizgi qyzmeti – ótpeli ekonomıkasy bar elderdi qoldaýǵa jáne damytýǵa baǵyttalǵan. Atalǵan bank Saharanyń ońtústigine qaraı ornalasqan Afrıka elderi men Irak memleketinde bank operatsııalaryn keńeıtý týraly bastamasyn kóterdi. Tıisti túzetýler banktiń basqarýshylar keńesiniń 2023 jylǵy 18 mamyrdaǵy №259 qaýlysymen qabyldandy. Atalǵan kelisimniń 1-babyna tıisti túzetýlerdiń engizilýi bankke múshe memleketterdiń jáne bank qyzmetin alýshy elderdiń ekonomıkalyq saladaǵy halyqaralyq yntymaqtastyǵyn keńeıtýge arnalǵan», - dedi QR Qarjy mınıstri Mádı Takıev.

Onyń aıtýynsha, bank operatsııalarynyń jańa elderge taratylýy qazir bank qyzmetteri kórsetilip jatqan elderdi qoldaý qabiletin tómendetpeıdi.

«Osy kelisimdi ratıfıkatsııalaý elimiz úshin teris áleýmettik-ekonomıkalyq, quqyqtyq saldarǵa ákelip soqpaıdy, sondaı-aq respýblıkalyq bıýdjetten qarajat bólýdi talap etpeıdi», - dedi mınıstr.

M. Takıev Qazaqstan Eýropa Qaıta Qurý jáne Damý Bankiniń teń quryltaıshysy bolǵandyqtan, elimizdiń osy qarjy uıymyndaǵy úlesi bar ekenin atap ótti.

«Elimiz osy banktiń aktsıoneri sanalady. Sondyqtan bul kelisimdi ratıfıkatsııalaý arqyly biz olardyń qyzmetin ary qaraı keńeıtýge múmkindik beremiz. Bizdiń úlesimiz 0,23 paıyzdy qurap otyr», - dep túsindirdi vedomstvo basshysy.