Májilis EAEO elderi kásiporyndaryna qatysty qujatty qabyldady

<p>ASTANA. KAZINFORM &ndash; Búgin Májilistiń jalpy otyrysynda &laquo;2014 jylǵy 29 mamyrdaǵy Eýrazııalyq ekonomıkalyq odaq týraly shartqa EAEO-ǵa múshe memleketter ónerkásip salalarynda birlesken kooperatsııalyq jobalardy iske asyrǵan kezde qarjylaı járdem kórsetý bóliginde ózgerister engizý týraly hattamany ratıfıkatsııalaý týraly&raquo; Zańy qabyldandy.</p>

Bul hattama Máskeýde 2023 jylǵy 25 mamyrda jasalǵan jáne ónerkásip salalarynda birlesken kooperatsııalyq jobalardy iske asyrǵan kezde qarjylaı járdem kórsetýge baǵyttalǵan.

Hattamanyń maqsaty – Eýrazııalyq ekonomıkalyq odaqqa múshe memleketterdiń kásiporyndary arasyndaǵy kooperatsııalyq baılanystaryndy keńeıtý, ózara ınvestıtsııalardyń ósýin yntalandyrý jáne birlesip óndiriletin ónim shyǵarýdy ulǵaıtý.

«Hattama Eýrazııalyq ekonomıkalyq odaq bıýdjeti esebinen ónerkásip salalaryndaǵy kooperatsııalyq jobalardy qarjylandyrý úshin quqyqtyq negizdi qalyptastyrady. Buǵan deıin bıznes-qaýymdastyqtar jaǵynan EAEO aıasynda ónerkásiptik kooperatsııany damytatyn qosymsha qoldaý quraldary qajet ekeni atap ótilgen bolatyn. Osyǵan baılanysty, Eýrazııalyq ekonomıkalyq odaq sheńberinde ózara ınvestıtsııalardy arttyrýǵa, jańa jumys oryndaryn ashýǵa, óndiris aktıvteriniń turaqtylyǵyn arttyrýǵa múmkindik beretin qarjylandyrýdyń jańa formaty ázirlendi. Bul mehanızm Alqa, Keńes, Eýrazııalyq úkimetaralyq keńes jáne Joǵary Eýrazııalyq ekonomıkalyq keńes otyrysynda qaralyp, maquldandy», - dedi QR Ónerkásip jáne qurylys mınıstri Qanat Sharlapaev.

Bul rette mınıstr qarjylyq járdemdesý mehanızmine toqtaldy.

«Mehanızm 5 jyl merzimge pılottyq rejımde bekitiledi. Arnaıy, dempıngke qarsy jáne ótemaqy bajdarynan túsetin jalpy somanyń 10 paıyzy qarjylandyrý kózi bolady. Bir jobaǵa sýbsıdııanyń maksımaldy kólemi jylyna 1 mlrd 890 mıllıon teńgeni qurap, 5 jyl ishinde 9 mlrd 450 mıllıon teńgege jetedi. Qarajat Eýrazııalyq ekonomıkalyq odaqqa múshe memleketterdiń ulttyq bankteri belgilegen bazalyq stavkanyń 100% mólsherinde múshe memleketterdiń ulttyq qarjy uıymdaryna jáne Eýrazııalyq Damý Bankine sýbsıdııa túrinde beriledi. Bul rette, kredıttiń kommertsııalyq mólsherlemesi bazalyq mólsherlemeden 6,5% aspaýy qajet.

Qarjy uıymdarynyń tizbesin 2023 jyldyń jeltoqsanynda Eýrazııalyq ekonomıkalyq komıssııanyń Keńesi bekitti. Tizbege, Qazaqstannan 15 qarjy uıymy engizildi. Onyń ishinde Qarjy naryǵyn retteý agenttigi jáne Ulttyq Bankpen kelisilgen ekinshi deńgeıdegi 11 bank jáne «Báıterek» holdıngine enshiles 4 kompanııa bar», - dedi vedomstvo basshysy.

Qarjylyq járdemdesý tetigi aıasynda kooperatsııalyq jobalardy irikteý kezinde mynadaı negizgi sharttar belgilengen:

- keminde EAEO-ǵa múshe úsh memlekettiń kásiporyndarynyń qatysýy;
- kooperatsııalyq joba sheńberinde óndiriletin ónim múshe memleketterden shyǵarylýy tıis;
- jobany iske asyrý merzimi 5 jyldan aspaıdy.

«Kooperatsııalyq jobalardy irikteý birneshe kezeńde júzege asyrylady. Aldymen, qaryz alýshy qarjy uıymyna ótinim beredi. Ótinimdi qaraý qorytyndysy boıynsha joba belgilengen tártippen Eýrazııalyq ekonomıkalyq komıssııanyń saraptama tobynda jáne ónerkásip jónindegi konsýltatıvtik komıtetinde, sondaı-aq Eýrazııalyq ekonomıkalyq komıssııa Alqasy men Keńesiniń otyrysynda qaralady. Jobany qaraýdyń barlyq kezeńderine memlekettik organdar men bıznes qoǵamdastyǵynyń ókilderi qatysady. Jobany maquldaý jáne sýbsıdııa berý týraly sheshim Eýrazııalyq ekonomıkalyq komıssııanyń Keńesinde qabyldanady. Bul Keńeske Qazaqstannan Premer-Mınıstrdiń orynbasary múshelik etedi», - dedi Q. Sharlapaev.

Mınıstrdiń sózine qaraǵanda, qazir Qazaqstannan basqa barlyq Eýrazııalyq ekonomıkalyq odaqqa múshe-memleketter hattamany ratıfıkatsııalaý rásimin aıaqtaǵan.