Májilis depýtattary Almaty metrosynda salynyp jatqan jańa stansanyń qurylysymen tanysty
Naýryzbaı aýdanyndaǵy «Qalqaman» metro stansasy 2026 jyly paıdalanýǵa berilýi kerek. Qurylys barysynda sol jaq týnnelde 936 metr, oń jaq týnnelde 559 metr qazylǵan. Gazben jabdyqtaý, elektr júıesi, telekommýnıkatsııalar men sý qubyrynyń syrtqy jelilerin kóshirý jumystary jospar boıynsha júrgizilýde.
Depýtattar jumysshylarmen sóılesip, qurylys jumystarynyń kestesimen tanysty.
«Jalpy metro qurylysshylarynyń saýatty jáne sapaly jumysyn atap ótkim keledi. Sonymen qatar «Qalqaman» stansasyna deıingi jeli qurylysy 2,5 jyldan beri júrip jatyr, al megapolıs keptelisten kóz ashpaı otyr. Jumys uzaqqa sozylyp barady, qurylys úshin jer ýchaskelerin, jeke úılerdi satyp alý qajet, al ıeleri satqysy kelmeıdi, ótemaqy somasyna kelispeıdi. Adamdar sottasyp jatyr, tipti, keı ister Joǵarǵy sotqa deıin jetken jaǵdaılar bar. Osy ýaqyt ishinde jobanyń qymbattaýy, qaıta baǵalaý, memlekettik saraptama qajet bolady. Óz tarapynan, depýtattar zańnamalyq deńgeıde qoldaý kórsetip, respýblıkalyq bıýdjetten qarjy bólinýine kómektesetin bolady», – dedi májilis depýtaty Sergeı Ponomarev.
Aıta ketý kerek, bul joba «AMANAT» partııasynyń Almaty qalasy boıynsha saılaýaldy baǵdarlamasynyń «Yńǵaıly kólik júıesi» bólimine engizilgen, ol 4 stansanyń qurylysyn qamtıtyn metro jelisin 7,2 shaqyrymǵa uzartýdy kózdeıdi. Bul jolaýshylar aǵynyn táýligine 100 myń adamǵa deıin arttyrýǵa jáne qazirgi trafıktegi júktemeni azaıtýǵa múmkindik beredi. 2030 jylǵa deıin «Barlyq» bazaryna deıin taǵy úsh stansa salý josparlanýda, onda Batys avtovokzalyn qamtıtyn iri mýltımodaldy kóliktik-aýysymdyq torap qurylatyn bolady.
Buǵan deıin Májilis depýtattary qaladaǵy JEO-2-ni jańǵyrtý jumystarymen tanysyp, gaz otynyna kóshý 2026 jyly aıaqtalýy tıis ekenin málimdegen edi. Sondaı-aq halyq qalaýlylary birqatar eńbek ujymdarymen kezdesip, azamattardy qabyldap, áleýmettik mańyzy bar nysandardy aralady.