Májilis depýtaty Jetisý turǵyndarynyń ótinishterin baqylaýǵa aldy

<p>ASTANA. KAZINFORM &ndash; Depýtattardyń aımaqtarǵa sapary jalǵasyp jatyr. Májilismen Rýslan Qojasbaev &laquo;AMANAT&raquo; partııasy Jetisý oblysy boıynsha fılıalynyń qoǵamdyq qabyldaý bólmesinde azamattardy qabyldady. Bul týraly Májilistiń Baspasóz qyzmeti málimdedi.</p>

Qabyldaý barysynda oblys turǵyndary depýtatqa áleýmettik qamsyzdandyrý, bilim berý, kommýnaldyq sharýashylyq, jol qurylysy jáne basqa da máselelerdi kóterdi. Taldyqorǵan qalasynyń kásipkeri Erlik Beıbituly eki jyldan astam aǵash óńdeý kásibimen aınalysyp keledi. Endi ony keńeıtip, jańa qural-jabdyqtar alýdy josparlap otyr. Kásipkerlerdi qoldaýdyń memlekettik baǵdarlamasy boıynsha 5 mıllıon teńge óteýsiz grant alý úshin bıznes-jospar daıyndaǵan. Biraq komıssııa quramynda tıisti mamandar bolmaǵandyqtan ony qorǵaı almaǵan. 

– Granttardy bólý erejeleri ýaqyt talabyna saı bolýǵa tıis. Bul máseleni Ulttyq ekonomıka mınıstrligimen birlesip zerdeleý qajet. Sonda múmkindiginshe shaǵyn bıznes tegin granttardy paıdalana alady, – dedi Rýslan Qojasbaev.

Bul rette depýtat bıznesti qoldaý boıynsha basqa da birqatar memlekettik baǵdarlama bar ekenin eske saldy. Máselen, «DAMÝ» qory arqyly, «Bıznestiń jol kartasy», «Ulttyq kásipkerlikti damytý jobasy» jáne basqalar. Áleýmettik qorǵaý máselesi de kóterildi. Taldyqorǵan qalasyndaǵy «Asar» dene shynyqtyrý-saýyqtyrý ortalyǵynyń basshysy Eldos Baıalyshbaev kóppáterli turǵyn úılerdi erekshe qajettilikteri bar adamdar úshin beıimdeýdiń, atap aıtqanda, kireberis esik, balkon, as úıge arnalǵan arnaıy qurylǵylarmen jabdyqtaýdyń mańyzdylyǵyna nazar aýdardy.

Bul rette Rýslan Qojasbaev qoljetimdi ortany qurý boıynsha «Kedergisiz keleshek» partııalyq jobasyna toqtaldy. Qazirgi tańda ákimdik Jetisý óńirinde 2021-2023 jyldar aralyǵynda beıimdeý josparlanǵan 410 áleýmettik nysannyń 382-sinde beıimdeý sharalaryn júrgizdi. 

– Qoljetimdilik standarttary ázirlenbeı turyp salynǵan úıler baryn, lıft nemese pandýs ornatý múmkin emes jerler de bar ekenin umytpaǵan jón. Endi bizdiń mindetimiz – árbir qurylys kompanııasy barlyq tehnıkalyq standartqa saı bolýy úshin ázirleýshilerdi qadaǵalaý. Barlyq naqty faktini jergilikti atqarýshy organdarǵa joldaımyn, anyqtalǵan buzýshylyqtar jaqyn arada joıylýǵa tıis, – dedi depýtat.

Jetisý óńirindegi «AMANAT» partııasynyń qoǵamdyq qabyldaý bólmelerine barlyǵy 2024 jyldyń basynan beri 1500-ge jýyq aryz-shaǵym tirkelip, olardyń basym bóligi oń sheshimin tapqan.