Májilis depýtaty: Sıyrǵa qora salýǵa aqsha bar da, aýyldaǵy múgedekke joq pa

<p><span style="font-family: sans-serif; font-size: 18px;">Májilis depýtaty Tańsáýle Serikov Ónerkásip jáne qurylys mınıstrligine jańa baspana salynbaǵan aýyldarda turatyn múgedekterge eski úılerdi memleket qoldaýymen satyp alýǵa múmkindik berýdi usyndy, dep habarlaıdy&nbsp;</span><a style="padding: 0px; margin: 0px; font-size: 18px; font-family: sans-serif;" href="https://kaz.inform.kz/" target="_blank" rel="noopener">QazAqparat tilshisi.</a></p>

«Qazaqstanda 720 myńnan astam múgedektigi bara adam tirkelgen. Onyń 310 myńy aýyldarda turady. Ózderińiz de jaqsy túsinip otyrsyzdar, І toptaǵy múgedekterdiń járdemaqysy – 89 128 teńge.

Mınıstrlikterdiń ókilderi, «Otbasy bank» ókili múgedektigi bar adamdardyń baspana alýyna, baspana jaldaýyna respýblıkalyq, oblystyq mańyzy bar qalalarda, monoqalalarda jaǵdaı jasalatynyn aıtyp otyr. Al aýyldardaǵy, aýdan ortalyqtaryndaǵy múgedektigi bar adamdar ne isteýi kerek? Aýyldarda úı salynbaı jatqanyna 30 jyl boldy. Jáı jer úıler bar. Sol jer úılerdi satyp alýǵa múmkindik bola ma? Ákimdiktiń quzyretine jatatyndaı etsek bola ma? Biz sıyrǵa qora salýǵa sýbsıdııa berip jatqanda, múgedekter sıyrdyń qataryna da jaramaı qaldy ma?», – dep surady depýtat.

Ónerkásip jáne qurylys vıtse-mınıstri Tımýr Qaraǵoıshın memleket bıýdjeti aýyldaǵy eski úıdi satyp alýǵa jumsalmaıtynyn aıtty.

«Aýyl men aýdanda turatyn І jáne ІІ toptaǵy múgedekterge birinshi naryqtaǵy jańa úıden baspana satyp alýǵa ruqsat beremiz. Al qurylys salynbasa, memlekettik qordan alýǵa ruqsat beremiz. Bul aýdan ákimderine, oblys ákimderine de baılanysty. Keıbir aýdan ákimderi qospáterli úıler saldy. Mınıstrlik oǵan qarsylyq qylǵan joq. Biraq biz aıtyp otyrmyz. Eski úılerdi satyp alýǵa memlekettiń qarjysyn jumsamaımyz. Bıýdjetten oǵan qarjy jumsamaımyz. Ákimder, aýdan ákimderi bar, memleket qorynan jańa úıler salyp bersin.

І jáne ІІ sanattaǵy múgedekter eshqashan nesıe ala almaıdy. Ony bárimiz bilemiz. Múgedek asyrap otyrǵan otbasylar nesıe ala alady. Naqty sandy aıtaıyn, 70 myń adam 2 paıyzdyq nesıe ala alady. Qalǵandary memlekettik qordan alý kerek. Biz túgendeýdi bastadyq. Inventarızatsııa kezinde eshkim sottaspaıdy da. Qazir atynda úıi bar múgedekter kezekten shyǵarylyp jatyr. Birneshe úı alǵan adamdar bar. Osyndaı sebeppen baspana kezeginen kópbalaly otbasylar kóp shyǵarylyp jatyr. Mine, osylaı kezekti azaıtamyz. Kezekti mindetti túrde azaıtamyz», – dedi Tımýr Qaraǵoıshın.