Májilis depýtaty Maıqaıyń turǵyndary úshin qaýipsizdik jaǵdaıyn qarastyrýdy surady
«Jyl basynda Pavlodar oblysynyń Baıanaýyl aýdanyndaǵy «Maıqaıyń Altyn» aktsıonerlik qoǵamy aýmaǵynda oryn alǵan apat qabyrǵamyzdy qaıystyrdy. Kásiporynda qyzmet atqaratyn tórt birdeı azamat avtobýs ishinde kenetten opyrylǵan jer astyna qulady. Onyń ekeýi mert bolsa, qalǵan eki azamattyń taǵdyry áli de beımálim. On kúnnen astam ýaqyt boıy izdeý-qutqarý jumystary jalǵasyp jatyr. Avtobýsta qalǵan eki azamatymyz da tabylmady. Qaqaǵan qystyń yzǵaryna qaramastan, táýlik boıy júrip jatqan qutqarý jumystaryna oblys ákimdiginiń jaýapty qyzmetkerleri men basshylyǵy qatysyp otyr. Qajetti kómek árbir otbasyna kórsetilip jatyr. Eń ókinishtisi, qulaǵan jerdiń astynda buryndary shahta bolǵanyn eshkim eskertpegen. Tipti, ústinen jol salǵan jáne sol joldy qyzmetkerler osy kúnge deıin paıdalanyp kelgen. Al, tehnıkalyq qaýipsizdik sharalaryna saı, ol jerdi qorshaýǵa alyp, qaýipti zona retinde oqshaýlap tastaý kerek edi. Degenmen, bul máseleniń basy ǵana. Kentte turatyn «Shanhaı» shaǵyn aýdanynyń turǵyndary da alańdap otyr. Oǵan sebep - shaǵyn aýdannyń asty da shahtaǵa aınalyp ketken. Ken qazý barysyndaǵy jarylystardan úı irgesi solqyldap ketetinin aıtyp otyr. 100-ge jýyq shańyraq ornalasqan aýmaq, qazirgi opyrylyp qulaǵan jerden nebári 500 metr qashyqtyqta ornalasqan», - dedi J. Amantaıuly Májilistiń jalpy otyrysynda.
Onyń aıtýynsha, qazir 10 myńǵa jýyq halyq turatyn eldi mekenniń negizgi tirshilik kózi de osy ken oryndarynda. Tek «Maıqaıyń Altynda» myńnan astam jergilikti turǵyn eńbek etip jatyr. «Maıqaıyń Altyn» resmı saıtyndaǵy málimetterge súıensek, kásiporyn qurylǵan ýaqyttan beri munda 16,7 mln tonna ken óndirilgen. Bul degenimiz – 80 tonna altyn, 1 240 tonna kúmis, 204 myń tonna mys, 300 myń tonna myrysh. 13 mln tonnadan astam ken kásiporynǵa qarasty ken baıytý fabrıkasynda qaıta óńdelgen.
«Sóıte tura, «Maıqaıyń Altyn» óz qarjysyna kentte eshqashan turǵyn úı salmaǵan, balalar alańy, sporttyq nemese áleýmettik nysandar turǵyzbaǵan. Tek jylyna jergilikti bıýdjetke bardy-joqty alym-salyq tólep kelgen. Al, endi osy aktsıonerlik qoǵamnyń 100 paıyz aktsııasy Kıpr Respýblıkasynda ornalasqan «Rence Enterprises LTD» kompanııasyna tıesili. Ol kompanııa Mılan Popovıch degen bıznesmenge tıesili. Elimizdiń baılyǵyna kenelgen bul baı-patshalardyń isin kim qadalaýǵa alady?», - dedi depýtat.
Bul rette ol komıssııanyń jumysyn ashyq ári jurtshylyqpen, jergilikti turǵyndarmen birlese otyryp úılestirý kerek.
«Osy mańdaǵy barlyq shahtalyq jumys júrgizilgen aýmaqtardy anyqtap, olardy qaýipsizdik erejelerine saı oqshaýlaý kerek. Shahtanyń mańynda ornalasqan shaǵyn aýyldyń turǵyndaryna barlyq qaýipsizdik jaǵdaıyn qarastyrý qajet. Elimizdiń baılyǵyn paıdalanyp, biraq áleýmettik kómekti der kezinde kórsetpeı otyrǵan sheteldik kompanııalarǵa zań júzinde qatań sharalar qoldanylýy kerek. Oryn alǵan apatqa jáne tehnıkalyq qaýipsizdiktiń saqtalmaýyna túrtki bolǵan jaǵdaıǵa prokýratýra ádil baǵasyn berýi tıis», - dedi qajet Jarqynbek Amantaıuly.
Budan buryn Maıqaıyńdaǵy «Shanhaı» yqsham aýdanynyń turǵyndary úıleri jer astyna opyrylyp túsip ketý qaýpi boıynsha alańdap otyrǵanyn jazǵanbyz.