Májilis depýtaty Atyraý oblysynda kúshtik qurylym ókilderimen kezdesti

<p>ASTANA. KAZINFORM &ndash; Májilis depýtaty, &laquo;AMANAT&raquo; partııasy fraktsııasynyń múshesi Baqtyqoja Іzmuhambetov jumys saparymen Atyraý oblysyna baryp, óńirdegi áskerı bólim quramymen, polıtseılermen jáne Tótenshe jaǵdaılar jónindegi departament qyzmetkerlerimen kezdesti.&nbsp;</p>

Kezdesý barysynda B. Іzmuhambetov áskerı bólimniń jeke quramymen, olardyń materıaldyq-tehnıkalyq jabdyqtalýymen jáne áskerı qyzmetshilerdiń jaǵdaıymen tanysty. Munan keıin májilismen oblystyq polıtsııa departamentiniń qyzmetkerlerimen júzdesti. Onda qala aýmaǵyndaǵy qoǵamdyq tártip, turǵyndardyń qaýipsizdigin qamtamasyz etý boıynsha atqarylyp jatqan jumystarǵa baqylaý júrgizip, qyzmetkerlerdiń oı-pikirin tyńdady.

Óz kezeginde Baqtyqoja Іzmuhambetov polıtsııanyń qoǵamdaǵy rólin eskere kele, tártip saqshylaryna da memleket tarapynan áleýmettik jáne quqyqtyq qoldaý qajet ekenin atap ótti.

– Qaýipsiz memleket qurý – memlekettik saıasattyń negizgi ustanymdarynyń biri. «AMANAT» partııasynyń saılaýaldy baǵdarlamasyna sáıkes, biz quqyq qorǵaý organdary qyzmetkerlerin quqyqtyq jáne áleýmettik qorǵaýdy arttyrý jóninde keshendi shara qabyldaýdy jalǵastyramyz. Polıtsııa qyzmeti tıimdi, esep berýge mindetti sanalyp, qazaqstandyqtardyń qajettiligin óteýge tıis. Kásibılik, ımandylyq pen adamgershilik polıtsııa qyzmetkeriniń izgi qasıetterine aınalýy kerek, - dedi ol.

Foto: Májilistiń baspasóz qyzmeti

Sonymen qatar Májilis depýtaty óńirdegi Tótenshe jaǵdaılar departamentiniń jeke quramymen kezdesti.

Foto: Májilistiń baspasóz qyzmeti

Jıyn barysynda halyq qalaýlysy №13 mamandandyrylǵan órt sóndirý bóliminiń materıaldyq-tehnıkalyq jabdyqtalýymen tanysty. Keıin jeke qurammen kezdesip, olardy tolǵandyratyn máselelerdi tyńdap, Parlament qabyrǵasynda atqarylyp jatqan jumystar men jańadan qabyldanǵan zańdar týraly aqparat berdi. 

Basqosýda sondaı-aq jeke quramnyń biliktiligin arttyrýǵa jáne jumys jaǵdaılaryn jaqsartýǵa qatysty máseleler talqylandy.