Májilis depýtaty Arqalyq qalasyna áýejaı salýdy usyndy

<p>Arqalyq qalasyna qaıtadan áýejaı salý kerek. Bul týraly Úkimet basshysynyń birinshi orynbasary Roman Sklıardyń atyna saýal joldaǵan Májilis depýtaty Berik Beısenǵalıev aıtty, dep habarlaıdy Kazinform.</p>

«Osy jyldyń 19 jeltoqsanynda Kólik mınıstri taıaýdaǵy 2-3 jylda Balqash pen Úrjardyń áýejaılaryna jańǵyrtý josparlanyp otyrǵanyn, sondaı-aq, Qarqaraly men Ulytaýda, Zaısan men Katonqaraǵaıda áýejaılar salý máselesi pysyqtalýda dep habarlady. Jóndeý men qurylysqa barlyǵy 71 mlrd. teńge jumsalatyn bolady. Árıne, mınıstrliktiń bul bastamalary kólik logıstıkasynyń damýyna ǵana emes, osy óńirlerdiń áleýmettik-ekonomıkalyq damýyna da oń áserin tıgizetini sózsiz. Osyǵan baılanysty, «AMANAT» partııasynyń Qostanaı oblysynda Arqalyq qalasy men shalǵaıdaǵy Amangeldi jáne Jangeldın aýdandarynyń turǵyndarymen kezdesýleri barysynda kópten beri turaqty túrde kóterilip júrgen Arqalyqta da áýejaı salý qajettiligin eske salǵym kelip otyr», - dedi Májilis depýtaty.

Onyń atap ótýinshe, buryn Arqalyq Torǵaı oblysynyń ortalyǵy bolyp turǵan kezde onda úlken áýe kemelerin qabyldaı alatyn áýejaı bolǵan. Oblys jabylyp qalǵan soń, múltiksiz jumys istep turǵan nysan sol kezdegi bılik pen Qazaqstannyń áýe ákimshiliginiń qaraýynsyz qalyp, aqyr sońy jekege satylyp, sharýasy bitken. Búginde áýe qatynasynyń bolmaýy óńirdiń tolyqqandy áleýmettik-ekonomıkalyq damýyna kedergi keltirip otyr.

«Osyǵan oraı, óńirdiń áleýmettik-ekonomıkalyq damýy jáne óńiraralyq baılanystardy kúsheıtý úshin kólik mınıstrligine Arqalyq qalasynda áýejaıdy qaıta salý máselesin pysyqtaýdy, keıinnen osy baǵytta áýe qatynasyn ashýdy tapsyrýdy suraımyn», - dedi Berik Beısenǵalıev.