Májilis depýtaty aport almasy men qyzǵaldaqty ulttyq brend etýdi usyndy
«Otandyq tuqym ósirýshilerdi qoldaýymyz kerek. Memleket tarapynan qoldaý kórmeı otyrǵan tuqym sharýashylyǵymen aınalysatyn fermerlerdi qoldaý qajet. Mysaly, Qaraǵandy oblysyndaǵy «Astro-Agro» JShS, bul mekeme jyldar boıy kartopty ǵylymı turǵydan zerdelep keledi, biraq, ókinishke qaraı, memleket tarapynan qoldaý kórmeı kele jatyr», - dedi Amanjol Áltaev Májilis qabyrǵasynda ótken jıyn barysynda.
Osy oraıda, halyq qalaýlysy shetel tájirıbesin úlgi etti.
«Ósimdikterdiń jańa sorttaryn qorǵaý jónindegi halyqaralyq odaqqa múshe bolýǵa qatysty byltyr áriptesterimizben Nıderlandyda boldyq. Baıqaǵanymyz, tuqym sharýashylyǵy salasynda bizden biraz ozǵan, ony moıyndaýymyz kerek. Endi biz osy odaqqa múshe bolý arqyly, solardyń tájirıbesine súıene otyryp, otandyq tuqym sharýashylyǵyna jol ashýymyz kerek. Tuqym sharýashylyǵy salasynda ulttyq brendke qatysty usynystar bar. Mysaly, Nıderlandydaǵy qyzǵaldaqtyń otany – Qazaqstan. Qyzǵaldaqty ózimizde ósirip, ulttyq brendke aınaldyrýǵa bolady. Osy máseleni qolǵa alsaq. Odan bólek, Almatynyń aport almasy, qazir bala kezimizdegi aporttan aırylyp qaldyq», - deıdi ol.
Osylaısha, Amanjol Áltaev qyzǵaldaq pen aport almasyn ulttyq maqtanyshqa aınaldyrýdy usyndy.
Búgin Májilistiń Agrarlyq máseleler komıtetinde «Tuqym sharýashylyǵyn damytý. Ósimdikterdiń jańa sorttaryn qorǵaý jónindegi halyqaralyq odaqqa múshe bolý» taqyrybynda dóńgelek ústel ótti.
Aıta keteıik, sondaı-aq búgin Májilistiń jalpy otyrysynda «Qazaqstan Respýblıkasynyń aýmaqtyq qorǵanysy týraly» Zańy men ilespe qujat birinshi oqylymda maquldandy.