Májilis bızneske qatysty zańǵa Senat engizgen túzetýmen kelisti

<p>ASTANA. KAZINFORM &ndash; Búgin Májilistiń jalpy otyrysynda palata depýtattary &laquo;Qazaqstan Respýblıkasynyń keıbir zańnamalyq aktilerine bıznes júrgizý máseleleri boıynsha ózgerister men tolyqtyrýlar engizý týraly&raquo; zańyna Senattyń jańa redaktsııada usynǵan jekelegen baptarymen kelisti.</p>

«Parlament Májilisi osy zańdy byltyr 27 jeltoqsanda qabyldap, 963 pozıtsııadan turatyn salystyrmaly kestemen Senatqa joldandy. Senattyń kestesi 20 pozıtsııadan turady jáne engizilgen túzetýler naqtylaý sıpatynda. Sondyqtan buǵan deıin Májilis qabyldaǵan zańnyń tujyrymdamasy men mazmunyn ózgerpeıdi. Atap aıtqanda, Senat «Jer qoınaýy jáne jer qoınaýyn paıdalaný týraly» Kodeksine, Qazaqstan Respýblıkasynyń Áleýmettik kodeksine, mindetti áleýmettik medıtsınalyq saqtandyrý týraly, memlekettik kórsetiletin qyzmetter týraly, bala quqyqtary týraly, ádilet organdary jóninde, bilim týraly zańdar men basqa da zańnamalyq aktilerge jańa tolyqtyrýlar engizdi», - dedi Májilis depýtaty Bolatbek Najmetdınuly.

Onyń aıtýynsha, zańdy qoldanysqa engizý merzimi ózgerdi.

«Májilistiń Ekonomıkalyq reforma jáne óńirlik damý komıteti «Qazaqstan Respýblıkasynyń keıbir zańnamalyq aktilerine bıznes júrgizý máseleleri boıynsha ózgerister men tolyqtyrýlar engizý týraly» zańyna Senat engizgen túzetýlermen kelisýge bolady dep esepteıdi», - dedi depýtat.

Eske salsaq, ótken aptada Senattyń jalpy otyrysynda «Qazaqstan Respýblıkasynyń keıbir zańnamalyq aktilerine bıznes júrgizý máseleleri boıynsha ózgerister men tolyqtyrýlar engizý týraly» Zańy ekinshi oqylymda qaraldy. Senat zańnyń jekelegen baptaryn jańa redaktsııada usynyp, ony Májiliske qaıtardy. 

Zańdy Parlament Senatynda qaraý barysynda:

- Zańnyń jekelegen normalaryn retteýshilik saıasattyń qaǵıdattary men tásilderine sáıkes keltirýdi;

- oblystyq jáne aýdandyq mańyzy bar joldardy salýmen baılanysty maqsattar úshin memlekettik orman qory jerlerin basqa sanattaǵy jerlerge aýystyrý múmkindigin saqtaýdy;

- saýda qyzmetin retteý salasyndaǵy ýákiletti organ aıqyndaıtyn shekti saýda ústemeaqysyn qoldaný tártibin belgileýdi;

- áleýmettik mańyzy bar azyq-túlik taýarlaryna baǵany turaqtandyrý tetikterin iske asyrý kezinde memlekettik ataýly áleýmettik kómek alýshylarǵa qoldaý kórsetýdi kózdeıdi;

- paıdaly qatty qazbalardy óndirýge salynatyn salyqty esepteý úshin ken ornyn ázirleýdiń tehnıkalyq jobasynda belgilengen normalanǵan ysyraptar týraly derekterdi qoldanýdy;

- óńdeý ónerkásibi kásiporyndaryn otandyq shıkizatpen qamtamasyz etý tetigin jetildirýdi;

- Biryńǵaı tólemniń quramdas bólikteriniń úlesterin qaıta esepteýdi kózdeıtin túzetýler engiziledi.