Májilis áıelderdiń quqyqtary men balalardyń qaýipsizdigin qamtamasyz etetin Zańdardy qabyldady

<p>ASTANA. KAZINFORM &ndash; Búgin Májilistiń jalpy otyrysynda &laquo;Qazaqstan Respýblıkasynyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly&raquo; jáne &laquo;Qazaqstan Respýblıkasynyń Ákimshilik quqyq buzýshylyq týraly kodeksine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly&raquo; Zańdar qabyldandy.</p>

«Atalǵan zań jobalary Memleket basshysy Qasym-Jomart Toqaevtyń zorlyq-zombylyqtyń kez kelgen túri úshin jazany qatańdatý tapsyrmasyn oryndaý maqsatynda ázirlendi. Bul zańdar barlyq azamattardyń, onyń ishinde qoǵamnyń eń osal músheleri sanalatyn áıelder men balalardyń quqyqtary men múddelerin qorǵaýda qalqan bolýǵa, memlekettik saıasattyń quqyqtyq negizderin jetildirýge, qoǵamdaǵy tártip buzýshylyqqa baılanysty jaýapkershilikti kúsheıtýge arnalǵan. Eń bastysy qoǵamymyzdyń negizi otbasyndaǵy bereke-birlikti nyǵaıtý qundylyqtary engizilip otyr», — dedi zań jobalary týraly baıandama jasaǵan Májilis depýtaty Juldyz Súleımenova. 

Zańmen:
— turmystyq zorlyq-zombylyq kórgen belgileri bar adamdarǵa ýaqytsha turýǵa múmkindik bere otyryp, olarǵa qoldaý kórsetý bóliginde Otbasyn qoldaý ortalyqtarynyń quzyretterin naqtylaýǵa;
— densaýlyqqa jeńil zııan keltirgeni jáne uryp-soqqany úshin qylmystyq quqyq buzýshylyq jasaǵan adamdardy ustaý tártibin retteýge;
— qoǵamdyq kólikten májbúrlep túsirip jiberýge tyıym salynatyn balalardyń (on alty jasqa tolmaǵan adamdardyń) jasyn anyqtaýǵa;
— 16 jasqa tolmaǵan adamdarǵa seksýaldyq sıpatta qorlap tıiskeni úshin qylmystyq jaýaptylyqty kúsheıtýge;
— sottalǵan nemese tatýlasýǵa baılanysty qylmystyq jaýaptylyqtan bosatylǵan adamdarǵa sot belgilegen erekshe talaptardy qoldaný sharalaryn naqtylaýǵa baǵyttalǵan birqatar túzetý engizildi.

«Bul zańdardy qabyldaý eńbektegen baladan, eńkeıgen qarııaǵa deıin qoǵamnyń árbir azamatynyń quqyqtary qorǵalatyn qaýipsiz, ádil ári quqyqtyq qoǵam qurýdyń mańyzdy qadamy dep bilemiz», — dedi ol.

Depýtattar zańdardy qabyldap, Senat qaraýyna jiberdi.