Májıt Esenbaev keden odaǵynyń jumysyn baqylaıtyn qoǵamdyq komıssııa qurýdy usynady

ASTANA. 13 aqpan. QazAqparat - QR Qarjy mınıstrligi Kedendik baqylaý komıtetiniń basshysy Májıt Esenbaev Keden odaǵynyń jumysyn baqylaıtyn qoǵamdyq komıssııa qurýdy usyndy.

Ol bul usynysyn búgin QR Premer-Mınıstriniń orynbasary Qaırat Kelimbetovtiń qatysýymen ótken vedomstvonyń alqa májilisinde jasady. Onyń atap ótýinshe, mundaı qoǵamdyq birlestik keden organdaryndaǵy sybaılas jemqorlyqtyń tamyryna balta shabýǵa oń áserin tıgizedi. Sonymen qatar komıssııa tutynýshylardyń problemalaryna nazar aýdartyp, kedendik baqylaý rásimdeý jáne baqylaý protsedýralaryn jeńildetýge ári onyń ashyqtyǵyn qamtamasyz etýge septigin tıgizedi. «Mundaı qoǵamdyq baqylaý «Nur Otan» partııasynyń bastamasymen uıymdastyrýǵa bolady», - dedi komıtet tóraǵasy.

Jalpy M.Esenbaevtyń alǵa tartqan derekterine sáıkes, ótken jyly 65 kedenshiniń ústinen qylmystyq is qozǵalyp, 50 qyzmetker jumysynan bosatylǵan.