Májiliste Joǵary aýdıtorlyq palatany qurýǵa qatysty qujat tanystyryldy
«Túzetýlerdi 3 negizgi baǵytqa bólýge bolady. Birinshiden, zań jobasynda Prezıdenttiń jergilikti atqarýshy organdarǵa, Joǵary Sot Keńesine qatysty ókilettikterin qysqartýǵa, Parlamentti qalyptastyrý tártibin qaıta qaraýǵa jáne Prezıdent, sondaı-aq onyń jaqyn týystary qyzmetinde bolǵan kezeńde shekteýler engizýge qatysty erejeler qamtylǵan. Ekinshiden, Parlamentti qalyptastyrý tártibi men onyń birqatar fýnktsııasy bóliginde Konstıtýtsııaǵa engizilgen ózgeristerge baılanysty Parlament jáne onyń depýtattarynyń mártebesi týraly Konstıtýtsııalyq zańnamaǵa, onyń ishinde zań shyǵarý protsesiniń jańa erejelerin aıqyndaýǵa baǵyttalǵan tıisti túzetýler engizý qajet», - dedi Ádilet vıtse-mınıstri Alma Muqanova.
Onyń aıtýynsha, aralas saılaý júıesine kóshýge baılanysty saılaý zańnamasynda aralas saılaý júıesin qalyptastyrýǵa baǵyttalǵan erejelerdi qarastyrý eskerilgen.
«Budan basqa, zań jobasynda ákimderdi saılaý ınstıtýtyn oblystyq mańyzy bar qalalar men aýdandarǵa kezeń-kezeńimen taratý bóligindegi normalar qamtylǵan. Qujatta Esep komıtetin Joǵary aýdıtorlyq palata dep qaıta ataýǵa baılanysty, sondaı-aq Konstıtýtsııalyq Sottyń qurylýyna baılanysty túzetýler bar. Zań jobasynyń belgilengen baǵyttaryn iske asyrý konstıtýtsııalyq zańnamany júrgizilip jatqan saıası reformalarmen sáıkestendirýdi qamtamasyz etedi dep paıymdaımyz», - dedi vıtse-mınıstr.
Sonymen qatar búgin Májiliste «Qazaqstan Respýblıkasynyń keıbir zańnamalyq aktilerine Memleket basshysynyń 2022 jylǵy 16 naýryzdaǵy Joldaýyn iske asyrý máseleleri boıynsha ózgerister men tolyqtyrýlar engizý týraly» zań jobasy da tanystyryldy.
Prezıdenttiń jergilikti atqarýshy organdarǵa qatysty jekelegen ókilettikterin taratý ekerilgen. Atap aıtqanda, Konstıtýtsııaǵa engizilgen túzetýlerge sáıkes, Prezıdenttiń oblystar, respýblıkalyq mańyzy bar qalalar jáne astana ákimderiniń aktileriniń kúshin joıý nemese olardy toqtata turý, sondaı-aq aýdan, oblystyq mańyzy bar qala, qaladaǵy aýdan, aýdandyq mańyzy bar qala, aýyl, kent, aýyldyq okrýg ákimin qyzmetinen alyp tastaý jónindegi ókilettikteri alynyp tastaldy.
«Oblystardyń, respýblıkalyq mańyzy bar qalalardyń, astananyń ákimderin taǵaıyndaý Memleket basshysynyń balamaly negizde máslıhattardyń qaraýyna keminde eki kandıdatýra usynýy arqyly júzege asyrylatyn bolady. Sonymen qatar, Jergilikti ózin-ózi basqarýdy damytýdyń 2025 jylǵa deıingi tujyrymdamasyna sáıkes, jergilikti deńgeıde ákimderdi saılaý ınstıtýty kezeń-kezeńimen engizilip jatyr. Byltyr aýyldar men kentter ákimderin saılaý ótkizildi. Al 2023 jyldan bastap qanatqaqty rejımde aýdandar men oblystyq mańyzy bar qalalar ákimderin saılaý ótkiziletin bolady», - dedi A. Muqanova.
Budan bólek, saıası partııalardy tirkeý rásimderi jeńildeıdi. Osy oraıda saıası partııalardy tirkeýdiń mejesi 20 myńnan 5 myń múshege deıin tómendetý, saıası partııa qurý úshin bastamashy top múshelerine qatysty talaptardy 1 myńnan 700 adamǵa deıin qysqartý eskerilgen.
Eske sala keteıik, bıyl naýryz aıynda Memleket basshysy Esep komıtetiniń ornyna Joǵary aýdıtorlyq palata qurýdy usyndy.