Májiliste jaıylymdar týraly zań talaptarynyń oryndalý máselesi kóterildi

NUR-SULTAN. QazAqparat – Búgin Parlament Májilisiniń jalpy otyrysynda bir top depýtat jaıylymdyq jerlerdiń máselesi boıynsha Premer-Mınıstrdiń orynbasary Roman Sklıardyń atyna saýal joldady, dep habarlaıdy QazAqparat tilshisi.

«Bizdiń depýtattyq saýalymyzǵa saılaýshylardan jer máselesi týraly, sonyń ishinde jaıylym jerlerge qatysty kóptegen aryz-shaǵymdardyń kelgendigi negiz bolyp otyr. Barshańyzǵa belgili, 2017 jyly jaıylymdyq jerlerdiń jetispeýshiligi problemasyn sheshý úshin «Jaıylymdar týraly» Zańy qabyldandy. Zań jaıylymdyq alqaptardy tıimdi retteýdi damytýǵa, onyń ishinde jaıylymdardy utymdy paıdalanýǵa jáne olardyń ınfraqurylymyn jaqsartýǵa, jerdiń tozý protsesterin bolǵyzbaýǵa baǵyttalǵan. Zańnyń 13-15 baptaryna jáne Jer kodeksiniń 84-babyna sáıkes qabyldanǵan normalarda jaıylym jerlerdiń tıimdi qoldanylýy jóninde kórsetilgen ári mal ósirýmen aınalysatyn úı sharýashylyqtarynyń qajettilikterin qanaǵattandyrýǵa baǵyttalǵan», - dep toqtaldy Fahrıddın Qarataev.

Onyń paıymynsha, jergilikti atqarýshy organdar ol Zańǵa jetkilikti túrde mán bermeı keledi. Zańnyń 13-babyna sáıkes qabyldanǵan normatıvtik quqyqtyq aktiler - jaıylymdardy basqarý jáne olardy paıdalaný jónindegi josparlar óńirlerde praktıkada túrinde oryndalmaıdy. Sonyń saldarynan aýyl turǵyndary arasynda áli kúnge deıin túsinispeýshilik pen narazylyqtar týyndap, jer máselesi boıynsha daýlar kóbeıip otyr.

«Nur Otan» partııasynyń Partııalyq baqylaý komıtetiniń komıssııasy atalǵan máseleni qarastyryp, tıisti memlekttik organdarǵa jaıylym jerlerge qatysty naqty usynystar bergen bolatyn. Olda búgingi tańǵa daıin sheshimin tappaı otyr. Atalǵan komıssııanyń málimetine súıensek, eldi mekender úshin jaıylymdyq jerlerdiń tapshylyǵy barlyq oblystar boıynsha baıqalady, - dedi depýtat.

Osy oraıda ol jaıylymdardy paıdalaný tıimdiligin arttyrý maqsatynda:

1. Oblystyq, qalalyq, aýdandyq, aýyldyq okrýgter, kentter, aýyldyq ákimdikterine bıyldyń aıaǵyna deıingi merzimde «Jaıylymdar týraly» QR Zańynyń talaptaryn, onyń ishinde «Jaıylymdardy basqarý jónindegi josparlardy» jasaýdy, bekitýdi jáne praktıkalyq qoldaný bóliginde oryndaý sharalaryn qabyldaý;

2. Memleket basshysy Q. Toqaevtyń bıylǵy keńeıtilgen Úkimet otyrysynda bergen tapsyrmasyna sáıkes, jergilikti atqarýshy organdar eldi mekenderge qoldanylmaı jatqan jaıylym jer ýchaskelerin memlekettik menshikke qaıtarý jóninde qatań sharalar qabyldaý, sondaı-aq, árbir eldi meken boıynsha jaıylymdardy basqarý jóninde naqty josparlar qurýdy ári osy jaıynda halyqty ashyq túrde habardar etý;

3. Zań sáıkestigine oraı ortalyq jáne jergilikti atqarýshy organdarmen qabyldanǵan barlyq zańdyq aktilerge saraptama júrgizý;

4. «Jaıylymdar týraly» Zańnyń 13, 15 - baptaryn jáne Jer kodeksiniń 84-baby 2-tarmaǵynyń 4-1) tarmaqshasynyń oryndalýyn erekshe baqylaýǵa alyp, Aýyl sharýashylyǵy mınıstrligi, óńirlerdegi jergilikti atqarýshy organdar jáne jer ınspektsııasymen birlesip, Zańdaǵy bekitilgen mindetterdi der kezinde oryndaý usynyldy.