Májiliste jańa mektepter qurylysyna kedergi bolatyn máseleler kóterildi

NUR-SULTAN. QazAqparat – Parlament Májilisiniń jalpy otyrysynda Juldyz Súleımenova jańa mektepter qurylysyna kedergi bolatyn túıindi máselelerdi kóterdi. Osy oraıda depýtat QR Premer-Mınıstriniń birinshi orynbasary Álıhan Smaıylovtyń atyna saýal joldady, dep habarlaıdy QazAqparat tilshisi.

«Memleket basshysynyń Joldaýynda jańa mektepter sanyn 800-den 1000-ǵa deıin arttyrý tapsyryldy. Alaıda, ony túpkilikti sheshýde áli de túıindi máseleler bar. Eń basty másele, memlekettik bıýdjet qarajatynyń durys josparlanbaýy. Orta bilim berý obektileriniń qurylysy bıýdjet qarajaty esebinen únemi jetkiliksiz qarjylandyrylýda. Atap aıtqanda, qazir mektepter qurylysyna jan basyna shaqqandaǵy normatıvti esepteý ádistemesi 6 aılyq eseptik kórsetkish bazalyq tarıfine negizdelgen. Alaıda, 2019 jyly respýblıkalyq bıýdjet komıssııasynyń sheshimimen QR Úkimetiniń Qaýlysyna sáıkes, úsh aýysymdy, apatty mektepterdi jáne oqýshy oryndarynyń tapshylyǵyn joıý maqsatynda mektepter salýǵa arnalǵan bazalyq normatıv 6 aılyq eseptik kórsetkishten 9 aılyq eseptik kórsetkishke deıin kóterilgen. ıAǵnı, 6 aılyq eseptik kórsetkish bazalyq tarıfi mektep qurylysyn salýǵa jetkiliksiz ekendigi 2019 jyldyń ózinde belgili bolǵan», - dedi J. Súleımenova.

Onyń aıtýynsha, osy kezge deıingi esepteýler eski normatıvtermen júrgizilip keledi. Bıyl jalpy sıpattaǵy transfertterden 200 mekteptiń qurylysyna 95,7 mlrd teńge kózdelgen. Qosymsha qarajat 53 mlrd teńge jumyspen qamtýdyń jol kartasynan bólingen. Atalǵan qarajattyń aımaqtarǵa der kezinde jetpeýinen búginde 13 mektep merziminen kesh berilmek. Bıýdjettiń durys josparlanbaýy saldarynan jergilikti atqarýshy bılik organdary bilim berý obektilerin ýaqytyly eksplýatatsııaǵa engizýde qosymsha qarajat izdeýge májbir.

«Eń ókinishtisi, jańa bıýdjettiń jobasynda osy jaǵdaı qaıtalanyp otyr. Máselen, kelesi jylǵa 200 mekteptiń qurylysyna jalpy sıpattaǵy transfertterden 104 mlrd teńge kózdelgen, bul ótken jylmen salystyrǵanda 44 mlrd teńgege az. Tek qurylys materıaldary baǵasynyń 30%-ǵa óskenin eskersek, búgingi kúnniń ózinde bul qarajattiń jetkiliksiz ekeni aıtpasa da túsinikti. Qarajat tapshylyǵy kem degende 50 mlrd teńgeni quraıdy», - dedi depýtat.

Osy oraıda «Nur Otan» partııasy fraktsııasy músheleri kelesi usynystardy engizdi:

- Qazaqstan Respýblıkasynyń Úkimetine 1000 mektepti salý jónindegi keshendi is-sharalar josparyn qabyldaý;

- Kelesi jyldan bastap mektepter qurylysyna 9 aılyq eseptik kórsetkish bazalyq tarıfin qoldaný;

- Mektepter qurylysyn standartyn ózgertý eskerilgen.