Májiliste veterınarııa júıesine ózgerister kerektigi aıtyldy
«Búgingi tańda veterınarııa júıesinde jumys jetkiliksiz júrgizilgendikten, eldegi epızootııalyq ahýal biraz nasharlap ketti. Elge ımporttalǵan malmen birge kelgen ekzotıkalyq aýrý túrleri jáne shekaradaǵy veterınarııalyq baqylaýdyń álsireýi sebebinen janýarlardyń juqpaly aýrýlarynyń tizbesi keńeıdi. Tujyrymdamalyq durys emestigi belgili bolsa da, 2012 jyly memlekettik veterınarııalyq ınspektsııa qurylymdyq jáne fýnktsıonaldyq turǵydan bólshekteldi. Onyń shekaradaǵy bólimsheleri - keden qyzmetiniń qaraýyna, sondaı-aq baqylaý fýnktsııalary bólikteri jergilikti atqarýshy organdardyń veterınarııa qyzmetterine berildi. Munyń barlyǵy memlekettik veterınarııa ınspektsııasynyń fýnktsıonaldyq álsireýine ákeldi», - dedi Májilistiń Agrarlyq máseleler komıtetiniń tóraǵasy B. Ospanov.
Onyń sózine qaraǵanda, memlekettik tapsyrys sheńberinde asa qaýipti juqpaly aýrýlarmen kúres jumysynda da kemshilik kóp. Veterınarııalyq- profılaktıkalyq is-sharalar zańnamaǵa qaıshy túrde, bıýdjet qarajaty jetispeıdi degen syltaýmen búkil mal basyn tolyq qamtymaı júrgiziledi.
«Mal basyn esepke alýda da kemshilikter jeterlik. Óıtkeni barlyq jumys bastapqy derekterdi qaǵazǵa túsirip, qalyptastyrý jolymen qolmen atqarylady. Sonyń saldarynan jergilikti jerdegi veterınar dárigerler qaǵaz jumysqa kómilip otyr jáne málimetter naqty emes», - dedi B. Ospanov.
Onyń atap ótýinshe, joǵaryda aıtylǵandardy negizge ala otyryp, memlekettik veterınarııalyq ınspektsııa vertıkalyn qalpyna keltirip, oǵan buryn jergilikti atqarýshy organdardyń veterınarııalyq qyzmetterine berilgen baqylaý ókilettikteriniń bir bóligin qaıtarý, onyń fýnktsıonalyn qosymsha túrde kúsheıtý qajet.
«Praktıkada jumys istep júrgen veterınar qyzmetkerlerdiń eńbekaqyny arttyrý jáne aýyldyq jerde kommýnaldyq veterınarııalyq kásiporyndardyń barlyq aýrý túrleri boıynsha veterınarııalyq-profılaktıkalyq jáne emdeý is-sharalaryn júrgizý boıynsha aqyly qyzmetter kórsetýine ruqsat berilý kerek. Veterınarııalyq zańnamanyń talaptaryna sáıkes, búkil mal basy veterınarııalyq-profılaktıkalyq is-sharalarmen qamtylýy qajet. Mal basyn esepke alýdyń búkil protsesi tsıfrlyq formatqa kóshirý mańyzdy», - dedi depýtat.