Májiliste «Teńiz» jobasynan bosaıtyn 39,5 myń jumysshynyń keleshegi talqylandy
Bul máseleni Májilistiń jalpy otyrysynda depýtat Sálimjan Naqpaev kóterdi.
«Bizge Atyraý qalasynda jumys isteıtin «Teńizshevroıl» kompanııasynyń qyzmetkerleri habarlasty. Jaqynda «Teńiz» kenishinde iri jobanyń qurylysy aıaqtalady jáne sondaǵy jumysshylar bosatylady. Jalpy, kompanııanyń boljamy boıynsha, «Teńiz» kenishinde «Bolashaq» keńeıtý jobasy qurylysyn aıaqtap, 2022 jyly shamamen 39 500 adam qysqarady. Olardyń 37 100-i – qazaqstandyq kadrlar», - dedi depýtat.
Onyń aıtýynsha, atalmysh qysqarý Qazaqstannyń barlyq óńirindegi eńbek naryǵyna áser etedi.
«Sol sebepti qazir óz óńirlerine oralatyn qyzmetkerlerdi jumysqa ornalastyrý tártibi qarastyrylǵan ba? «Teńizde» qazaqstandyqtarmen birge 2400 sheteldik kadrlar da qysqartylmaqshy. Jumyspen qamtamasyz etý kezinde basymdyq bizdiń qyzmetkerlerge berile me, álde shetelden kelgen qonaqtarǵa berile me», - dep surady Májilis ókili.
Suraqqa jaýap bergen QR Premer-Mınıstriniń orynbasary Eraly Toǵjanov bul másele kún tártibinde turǵanyn atap ótti.
«Ótkende «Teńizshevroıl» basshysymen tikeleı kezdesý bolǵan. Sol kezdesýde Energetıka jáne Eńbek mınıstrlikterimen «TShO» arasynda arnaıy memorandýmǵa qol qoıyldy. Ol memorandým boıynsha, 39 myń adamnyń bári bir kezeńde jumyssyz qalmaıdy. Olar qazir 4 kezeńge bólindi. 2,7 myń adam birinshi toqsanda, 9 myńy ekinshi toqsanda, 11 myńy úshinshi toqsanda, 13 myńy tórtinshi toqsanda bosatylady dep otyrmyz», - dedi Úkimet basshysynyń orynbasary.
Sondaı-aq, ol «Teńiz» jobasyna shetelden tartylǵan azamattar elderine qaıtatynyn atap ótti.
«Ózińiz bilesiz, Atyraý qalasynda «NSS» komp a nııasynyń birneshe jobasy bar. 17,5 myń jumyskerimizdi sol jaqqa tartyp jatyrmyz. Ekinshiden, ol jerde jumys isteıtinderdiń 40 paıyzy ǵana Atyraýdyń óziniń halqy. Qalǵandary negizinen 5 óńirden tartylǵan. Sol óńirlermen qazir qoıan-qoltyq jumys istep, baratyn azamattardyń eline qaıtýyn, qaıta daıarlaý máselelerin de kún tártibine qoıyp, solarmen kúndelikti júıeli jumys júrgizilip jatyr.
Aıta keteıik, Májilistiń jalpy otyrysynda QR Densaýlyq saqtaý mınıstri Ajar Ǵınııat Ýkraınadan dári ákelý kelisimsharttarynyń kúshi joıylatynyn málim etti .