Májiliste sý resýrstaryn basqarý júıesin ońtaılandyrý usynyldy
«Sý qaýipsizdigin qamtamasyz etý – eldiń ulttyq qaýipsizdiginiń strategııalyq mindeti. Muny Memleket basshysy 26 qańtarda ótken Úkimettiń keńeıtilgen otyrysynda atap ótti. Osy salada qabyldanyp jatqan sharalarǵa qaramastan, eldegi sý problemasy jyl saıyn kúrdelene túsýde. Ózenderdiń aǵysy qysqarýy jáne kólderdiń qurǵaýy, tuşy sýdyń uzaq merzimdi qorlary – muzdyqtar men tońnyń erýi, jer asty basseınderdiń qarqyndy lastanýy baıqalady. Bul máseleler sý resýrstaryn basqarý jónindegi ulttyq jobamen qamtylýǵa tıis ekeni sózsiz», - dedi depýtat Májilistiń jalpy otyrysynda.
Osy oraıda ol óziniń júıeli sheshimin tappaǵan sektordyń negizgi problemalaryna toqtaldy. Birinshiden, sý resýrstaryn basqarýdyń memlekettik júıesiniń bytyrańqylyǵy men fragmentatsııalanýy saqtalýda. Búginde sý máselesimen 8 mınıstrlik, jergilikti atqarýshy organdar, sondaı-aq «Samuryq-Qazyna» ulttyq ál-aýqat qorynyń kompanııalary aınalysady. Osylaısha, sý saıasatyn júzege asyrýǵa 172 qurylymdyq bólimshe men uıym tartylǵan. Bul rette ony úılestirý joq. Sýdy basqarýdyń qalyptasqan kúrdeli júıesi memlekettik apparatty problemalardyń sebepterin sheshýge emes, saldarlaryn joıýǵa nazar aýdarýǵa májbúr etedi. Mundaı jaǵdaı azyq-túlik qaýipsizdiginiń tómendeýine, janjaldarǵa jáne halyqtyń kóshi-qonyna ákelýi múmkin.
«Ekinshiden, búginde salada sý mamandarynyń tapshylyǵy baıqalýda. Mysaly, depýtattarmen transshekaralyq sý bólý máseleleri boıynsha shektes memlekettermen kelissóz pozıtsııamyzdy nyǵaıtý týraly másele birneshe ret kóterilgen bolatyn. Alaıda, másele sý dıplomatııasy salasyndaǵy kelissóz júrgizýshi mamandardyń tapshylyǵyna tirelip otyr. Bilim men tájirıbe jınaqtalǵan birneshe ǵylymı ınstıtýttar materıaldyq-tehnıkalyq qamtamasyz etýdiń problemalaryn bastan keshirýde. Máselen, sý salasyndaǵy jabyq sıpattaǵy jobalardy júzege asyratyn jáne Qytaımen sý jónindegi kelissózderdi saraptamalyq súıemeldeýdi qamtamasyz etetin jalǵyz Geografııa jáne sý qaýipsizdigi ınstıtýty birneshe jyldan beri óziniń jeke ǵımaraty máselesin sheshe almaı keledi», - dedi Zúlfııa Súleımenova.
Onyń sózine qaraǵanda, joǵaryda baıandalǵannyń negizinde salanyń ózekti máselelerin daıyndalyp jatqan Sý resýrstaryn basqarý jónindegi ulttyq joba aıasynda sheshýdi qarastyrý mańyzdy.
«Birinshiden, sý saıasatyn shoǵyrlandyrý jáne sý resýrstaryn basqarý júıesin ońtaılandyrý. Bul rette osy keshendi jáne mańyzdy máseleniń sheshimin bir mınıstrlikke nemese bir ákimdikke aýdarýǵa bolmaıdy. Ekinshiden, ásirese sý dıplomatııasy salasynda sý mamandaryn daıarlaýdy jáne olardyń kelissóz protsesterine qatysýyn qamtamasyz etý. Úshinshiden, sý ǵylymı ortalyqtaryn tıisti materıaldyq-tehnıkalyq qamtamasyz etý máselesin sheshý. Sý qaýipsizdigi máselesi memlekettik saıasattyń basymdaqtaryna sóz júzinde emes, is júzinde aınalýy tıis», - dedi depýtat.