Májiliste sanıtarııalyq-epıdemıologııalyq qyzmettiń kemshilikteri aıtyldy
«Búgin Úkimet saǵatynda biz qazaqstandyqtar úshin ózekti máselelerdiń biri – Qazaqstan Respýblıkasyndaǵy sanıtarııalyq-epıdemıologııalyq ahýal týraly máseleni qaraımyz. Bul taqyryp árdaıym halqymyzdyń densaýlyǵy úshin mańyzdy boldy. Alaıda, qazirgi jaǵdaıda onyń ózektiligi edáýir artty. Ózderińiz biletindeı, koronavırýs ınfektsııasyna qarsy kúres búkil otandyq densaýlyq saqtaý júıesin qozǵady. Qarapaıym sózben aıtqanda, COVID-19 pandemııasy bizdiń densaýlyq saqtaý salasyn ábigerge saldy. Bul, ásirese, sanıtarııalyq-epıdemıologııalyq ahýalǵa áser etti. Ókinishke qaraı, ótken jyldyń qaıǵyly saldary sanıtarııalyq-epıdemıologııalyq qyzmettiń álsiz tustaryn kórsetip berdi», - dedi B. Kesebaeva Májilistegi Úkimet saǵatynda.
Onyń aıtýynsha, ótken jyly aýrý órship, osy kúnge deıin 11 350 azamat (2020 jylǵy naýryz – 2021 jylǵy 4 qazan aralyǵy) COVID-19 qurbany boldy. Buǵan aýrýdyń ózi ǵana emes, eldiń densaýlyq saqtaý júıesinde tereń oryn alǵan kemshilikter de sebep boldy.
«Memleket basshysynyń tapsyrmasy boıynsha shuǵyl túrde ınfektsııalyq aýrýhanalar quryldy, mamandar asyǵys túrde qaıta oqytyldy, emdeýdiń klınıkalyq hattamalary birneshe ret ózgerdi, ómirlik qajetti dárilik preparattar men medıtsınalyq tehnıka bolmady. Aýrýhanalar men emhanalarda uıymdastyrýshylyq haos ornady. Aýrýdyń jalyny qarapaıym naýqastardy ǵana emes, medıtsına qyzmetkerleriniń ózderin de sharpydy. «Halyq densaýlyǵy jáne densaýlyq saqtaý júıesi týraly» jańa Kodekste Bas sanıtarııalyq dárigerdiń erekshe mártebesi belgilenip, onyń ókilettikteri aıqyndaldy. Sanıtarııalyq-epıdemıologııalyq qyzmetke úlken ókilettikter berildi», - dedi ol.
«Búgingi kúni bizdiń aldymyzda halyqty vaktsınalaý mindeti tur. Dál osy ujymdyq ımmýnıtettiń qalyptasýy bizge – qalypty ómir saltyn, al ekonomıkamyzǵa turaqtylyqty qaıtarýǵa múmkindik beredi. Sondyqtan jappaı vaktsınalaýdyń mańyzdylyǵyn halyqqa durys jetkizýdiń máni zor. Sonymen qatar, sanıtarııalyq-epıdemıologııalyq qyzmettiń basqa baǵyttary, onyń ishinde qyzmettiń jumysyna qatysty máseleler de osy kezeńde nazardan tys qaldy. Máselen, asa qaýipti ınfektsııalar, vaktsınamen eńseriletin aýrýlar, jumystyń tsıfrlyq formatyn qamtamasyz etý keıingi orynǵa ysyryldy. Men búgin osy máselelerge erekshe nazar aýdarý kerek dep oılaımyn», - dedi Májilisi tóraǵasynyń orynbasary.