Májiliste múmkindigi shekteýli jandarǵa qoldaý kórsetý tetikteri qaraldy
«Keıinge qaldyrmaı sheshýdi talap etetin birqatar másele bar, óıtkeni olar halyqtyń eń qorǵalmaǵan ári osal toptaryna qatysty – bul múmkindigi shekteýli adamdar, onyń ishinde balalar. Múmkindigi shekteýli azamattarymyzdy áleýmettik qorǵaý Konstıtýtsııamen, «Qazaqstan Respýblıkasynda múgedekterdiń áleýmettik qorǵalýy týraly» Zańmen retteledi. Sonymen qatar, áleýmettik qorǵaýǵa, onyń ishinde ońaltýǵa, qoǵamǵa kiriktirýge, kez kelgen qyzmetti, onyń ishinde eńbek qyzmetin erkin tańdaýǵa, kásiptik daıarlaýǵa jáne qaıta daıarlaýǵa, eńbek qabiletin qalpyna keltirýge ári jumysqa ornalasýǵa, Qazaqstan Respýblıkasynyń turǵyn úı zańnamasyna sáıkes turǵynjaıǵa quqyqtar jáne budan da basqa da quqyqtar belgilenetin ózge de zańdarmen retteledi. Alaıda, is júzinde múmkindigi shekteýli jandar óz quqyqtaryn júzege asyrý barysynda birqatar problemalarǵa tap bolady», - dedi depýtat Parlament Májilisinde áleýmettik qorǵaý máseleleri týraly zań jobasynyń tanystyrylymyna arnalǵan jıynda.
Onyń aıtýynsha, múmkindigi shekteýli balalardyń baspana alý máselesi bar. Eger múgedek bala 18 jasqa tolǵanǵa deıin turǵyn úı alynbasa, otbasy kezekke qaıta turýǵa májbúr bolady, osylaısha kútý merzimi kóbeıedi.
«Múgedek adamdardyń jumysqa ornalasýy da qıyn is. «Halyqty jumyspen qamtý týraly» Zańyna sáıkes, jergilikti atqarýshy organdar aýyr jumystardy, eńbek jaǵdaılary zııandy jáne qaýipti jumystardaǵy jumys oryndaryn eseptemegende, jumys isteıtinderdiń jalpy sanynyń 2-den 4 paıyzǵa deıingi mólsherinde múgedekter úshin jumys oryndaryna kvota belgileıdi. Qazirgi ýaqytta, Eńbek jáne halyqty áleýmettik qorǵaý mınıstrliginiń aqparatyna sáıkes, kvota 4% quraıdy jáne 70 myń adam úshin belgilengen. Alaıda, kvota aıasynda barlyǵy 15 myń múmkindigi shekteýli jan nemese paıyzy jumysqa ornalastyryldy», - dedi B. Kesebaeva.
Onyń sózine qaraǵanda, múmkindigi shekteýli adamdardy ózderine laıyqty jumysqa ornalastyrý úshin jumys berýshilerdiń kóbirek nazar aýdarýyn mindetteıtin nemese yntalandyratyn qosymsha sharalar qajet.
«Sonymen qatar, ońaltý, qoǵamǵa kiriktirý, áleýmettik qoldaý sharalary boıynsha kórsetiletin qyzmetterdiń jetildirilmeýine baılanysty problemalar da bar. Budan basqa, 1-toptaǵy múgedektik berilgen aýyr naýqas adamdardy kútip-baǵýdy júzege asyratyn adamdar áleýmettik qoldaý sharalarymen jetkilikti qamtylmaǵan. Búgin qaralyp otyrǵan zań jobasynda osy máselelerdiń belgili bir sheshimderi usynylady, sonyń nátıjesinde múgedek balalar úshin, múgedek balalary bar otbasylar men asyraýshysynan aıyrylǵan otbasylar úshin járdemaqy mólsherin ulǵaıtý, birinshi toptaǵy múgedekterge kútim jasaıtyn adamdar úshin jańa járdemaqy engizý eskerilip otyr», - dedi depýtat.