Májiliste mıkroqarjy uıymdaryna qatysty ózgerister talqylandy

NUR-SULTAN. QazAqparat – Májiliste «QR keıbir zańnamalyq aktilerine saqtandyrý naryǵyn jáne baǵaly qaǵazdar naryǵyn retteý men damytý, bank qyzmeti máseleleri boıynsha ózgerister men tolyqtyrýlar engizý týraly» QR Zańynyń jobasyna Senat engizgen ózgerister men tolyqtyrýlar talqylandy, dep habarlaıdy QazAqparat tilshisi.

Májilis depýtaty, Qarjy jáne bıýdjet komıtetiniń hatshysy Danııa Espaevanyń aıtýynsha, zań jobasynyń negizgi maqsaty saqtandyrý naryǵyn jáne baǵaly qaǵazdar naryǵyn retteý men damytýǵa, bank qyzmeti salasyndaǵy zańnamany jetildirýge jáne mıkro jáne shaǵyn kredıt berý úshin mıkroqarjy uıymdarynyń áleýetin keńeıtýge baǵyttalǵan.

QR Parlamenti Májilisiniń qaraýyna 2022 jyly 27 sáýirde maquldaǵan zań jobasy Senat qaraýyna jiberilgen bolatyn. Parlament Senaty 9 maýsymda zań jobasyn keri qaıtardy.

«Senat 7 túzetýdi engizdi. Sonyń ishinde 6 túzetý redaktsııalyq naqtylaý sıpatynda jáne 1 túzetý – zań tehnıkasy boıynsha. Senat engizgen túzetýler zań jobasynyń tujyrymdamalyq erejelerin ózgertpeıdi. Joǵaryda aıtylǵandardy eskere otyryp, komıtet QR keıbir zańnamalyq aktilerine saqtandyrý naryǵyn jáne baǵaly qaǵazdar naryǵyn retteý men damytý, bank qyzmeti máseleleri boıynsha ózgerister men tolyqtyrýlar engizý týraly QR zańy jobasyn Senat engizgen ózgeristermen jáne tolyqtyrýlarmen kelisýdi usynady», - dedi D. Espaeva.

Aıta keteıik, zań jobasynda Qazaqstannyń 5 kodeksine jáne 35 zańyna ózgerister engizý kózdeledi.