Májiliste memlekettik-jekeshelik áriptestik boıynsha shyǵystardy azaıtý usynyldy
«Memlekettik-jekeshelik áriptestik tetikterin bıýdjet shyǵyndaryn «jeńildetý úshin» de belsendirek qoldaný qajet. Búgin Ulttyq ekonomıka mınıstri memlekettik-jekeshelik áriptestikti damytý jónindegi sharalar týraly tolyqqandy aqparat berdi. Degenmen, birqatar máselelerge toqtalǵym kelip otyr», - dedi depýtat.
Osy oraıda ol ekonomıkanyń barlyq salasy men qyzmet aıasy memlekettik-jekeshelik áriptestik jobalarymen jetkilikti qamtylmaǵanyn atap ótti.
N. Sabılıanov «Qazaqstan 2050» Strategııasyn, sondaı-aq «100 naqty qadam» Ult josparyn iske asyrý maqsatynda 2015 jyly «Memlekettik-jekeshelik áriptestik týraly» Zańy qabyldanǵanyn eske saldy.
Zańda qoldanýdyń barlyq salalary boıynsha shekteýlerdi alý, qatysýshylardyń quramyn keńeıtý, memlekettik-jekeshelik áriptestiktiń konkýrstyq rásimin ońaılatý jáne taǵy basqalar kózdelgen.
«Búgingi kúni ekonomıkanyń ártúrli sektorynda memlekettik-jekeshelik áriptestiktiń 1 000-nan asa jobalary málimdelgen. Onyń ishinde 443 shart jasalyp, sonyń 66 paıyzy bilim berý, 16 paıyzy densaýlyq saqtaý, 8 paıyzy mádenıet jáne sport salalaryna, 9 paıyzy qalǵan qyzmet salalaryna tıesili. Sýmen jabdyqtaý jáne kárizdendirý, energııamen jabdyqtaý, kólik, jol qurylysy, týrızm, turǵyn úı qurylysy, mádenıet salalary memlekettik-jekeshelik áriptestik jobalarymen tolyq qamtylmaǵan. Máselen, áleýmettik salada 4 joba, aýyl sharýashylyǵynda - 7 joba ǵana iske asyrylýda», - dep toqtaldy ol.
Sonymen qatar, úsh jyl ishinde arnaıy ekonomıkalyq aımaqtar ınfraqurylymynyń qurylysyn salý kezinde de memlekettik-jekeshelik áriptestik boıynsha birqatar máseleler týyndady.
«Osyǵan baılanysty ýákiletti organǵa, onyń ishinde «Memlekettik-jekeshelik áriptestiktiń qazaqstandyq ortalyǵy» aktsıonerlik qoǵamyna birqatar máselelerge nazar aýdarý kerek bolyp tur. Bul turǵyda memlekettik-jekeshelik áriptestikti alǵa jyljytý boıynsha júıeli jumysty jetildirý kerek. Salalyq ýákiletti jáne jergilikti atqarýshy organdar arasyndaǵy jumystar úılestirip, memlekettik-jekeshelik áriptestik jobalarymen qamtý qarqynyn údetken jón. Jumys istep turǵan jáne josparlanǵan MJÁ jobalarynyń tıimdiligine tereń taldaý júrgizip otyrý kerek», - dedi Nurtaı Sabılıanov.
Budan bólek depýtat memlekettik-jekeshelik áriptestik jobalarynyń ınvestıtsııalyq tartymdylyǵyna nazar aýdardy.
«Bul rette bıýdjetke túsetin salmaq azaımaı otyr. Sondyqtan Ulttyq ekonomıka mınıstrligi memlekettik-jekeshelik áriptestik nysanyn keńinen paıdalanýdy, bıýdjettik qarajatty jekemenshik ınvestıtsııalarmen almastyrýdy, memlekettik-jekeshelik áriptestik jobalary úshin bıýdjet shyǵystaryn barynsha azaıtýdy kózdeıtin basym baǵyttardy ázirleý kerek», - dedi ol.
Budan buryn habarlanǵandaı, Májilistegi Úkimet saǵatynda Tımýr Súleımenov memlekettik-jekeshelik áriptestiktiń damý qarqyny boıynsha esep bergen bolatyn.