Májiliste qos azamattyqpen kúresýge baǵyttalǵan qujat maquldandy
Qazaqstan Úkimeti men Belarýs Úkimeti arasyndaǵy kóshi-qon salasyndaǵy yntymaqtastyq týraly kelisimge 2019 jylǵy 25 qazanda Nur-Sultan qalasynda qol qoıyldy
Qujat aıasynda taraptar kóshi-qon, ekinshi tarap memleketiniń aýmaǵyndaǵy bir tarap memleketi azamattarynyń quqyqtaryn qorǵaý salasyndaǵy yntymaqtastyqty, onyń ishinde óz memleketteriniń zańnamalary men halyqaralyq mindettemelerine sáıkes aqparattyq ózara is-qımyldy júzege asyrady.
«Birinshiden, statıstıka men aqparat almasýǵa múmkindik beredi. Ekinshiden, azamattar týraly jeke aqparat alýǵa bolady. Úshinshiden, eki el úkimetteri tájirıbe almasyp, bir-birine praktıkalyq kómek kórsetedi», - dedi QR Іshki ister mınıstri Erlan Turǵymbaev.
Sonymen qatar, kelisimde kóshi-qon salasyndaǵy qylmystarmen kúresýge qatysty qadamdar eskerilgen. Belarýs Parlamenti kelisimdi 2020 jylǵy 18 mamyrda bekitti.
«Jalpy, Іshki ister mınıstrligi kóshi-qon boıynsha 23 halyqaralyq kelisimdi bekitti. Halyqaralyq deńgeıde taǵy da 9 kelisim daıyndalýda. Osy qujattardyń nátıjesinde zańsyz kóshi-qon boıynsha aqparat almasý jolǵa qoıylady, adamdardy basqa elderge qaıtarý máselesin sheshedi. Sonymen qatar, sheteldikterdiń Qazaqstanda bolý merzimi anyqtalady ári qos azamattyqqa jol bermeý tetikterin qamtıdy», - dedi mınıstr.