Májiliste «kóleńkeli» ekonomıkaǵa qarsy is-qımylǵa baǵyttalǵan qujat maquldandy

NUR-SULTAN. QazAqparat – Májilistiń jalpy otyrysynda «Salyq jáne bıýdjetke tólenetin basqa da mindetti tólemder týraly» QR Kodeksine (Salyq kodeksi) jáne «Salyq jáne bıýdjetke tólenetin basqa da mindetti tólemder týraly» QR Kodeksin (Salyq kodeksi) qoldanysqa engizý týraly» QR Zańyna ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy QazAqparat tilshisi.

Zań jobasy bıylǵy 10 qarashada Parlament Májilisiniń jalpy otyrysynda birinshi oqylymda maquldandy.

Qujat Memleket basshysynyń jekelegen tapsyrmalaryn, bıznes pen azamattardy qoldaý jónindegi bastamalardy, salyqtyq ákimshilendirýdi jaqsartý jónindegi sharalardy, onyń ishinde kóleńkeli ekonomıkaǵa qarsy is-qımylǵa baǵyttalǵan sharalardy iske asyrý maqsatynda ázirlendi.

Zań jobasy boıynsha múddeli memlekettik organdardyń, «Atameken» Qazaqstan ulttyq kásipkerler palatasynyń jáne salalyq qaýymdastyqtardyń qatysýymen Jumys tobynyń 7 otyrysy jáne Qarjy jáne bıýdjet komıtetiniń keńeıtilgen otyrystary ótkizildi.

Depýtattar zań jobasymen jumys aıasynda:

- kameraldyq baqylaý nátıjeleri boıynsha salyqtyq daýlardy retteýdiń mindetti sotqa deıingi tártibin engizýge baılanysty normalardy Zań jobasynan alyp tastaýǵa;

- «turǵynjaı» degen uǵymdy salyqtardy tóleý boıynsha bólip-bólip tóleýdi usyný kezinde qaralatyn «jeke tulǵanyń, dara kásipkerdiń, jeke praktıkamen aınalysatyn adamnyń jalǵyz turǵynjaıy» dep naqtylaýǵa;

- Salyq kodeksiniń 427 jáne 428-baptarynyń qoldanylý merzimderin 2025 jylǵy 1 qańtarǵa deıin uzartýǵa jáne olardyń redaktsııalaryn naqtylaýǵa;

- Qazaqstan Respýblıkasynyń halyqaralyq mindettemelerin saqtaý maqsatynda «Astana Hab» halyqaralyq tehnologııalyq parki men IT-tehnologııalar salasyndaǵy kirister boıynsha arnaıy ekonomıkalyq aımaqtarǵa qatysýshylardyń KTS boıynsha salyqtyq jeńildikterdi qoldaný erekshelikterine;

- QR Salyq kodeksiniń normalaryn jasalýy salyq tóleýshilerge salyq zańnamasynyń turaqtylyǵyna kepildik beretin Investıtsııalyq mindettemeler týraly kelisimdi engizý bóliginde Qazaqstan Respýblıkasynyń Kásipkerlik kodeksine sáıkes keltirýge qatysty túzetýler engizdi.

Depýtattardyń memlekettik bıýdjet túsimderin qysqartýdy kózdeıtin jáne Respýblıkalyq bıýdjet komıssııasynyń sheshimin talap etetin túzetýleri qorytyndy alý úshin Qazaqstan Respýblıkasynyń Úkimetine jiberildi. Qazaqstan Respýblıkasy Úkimetiniń qorytyndysymen qoldaý tapqan normalardy Komıtet qabyldady jáne olar salystyrma kestede kórsetildi.

Budan buryn habarlanǵandaı, zań jobasynda Qazaqstan Respýblıkasynyń aýmaǵy boıynsha halyqaralyq qatynasta jolaýshylar men júkterdi tasymaldaýdy júzege asyratyn sheteldik avtokólik quraldarynyń júrip ótýi úshin sheteldik tasymaldaýshylarǵa arnalǵan alym mólsherlemesin 20-dan 30 AEK-ke deıin arttyrý eskerilgen.