Májiliste kıberqaýipsizdik salasynda áskerı kadrlardy daıarlaý máselesi talqylandy

NUR-SULTAN. QazAqparat - Búgin Parlament Májilisinde aqparattyq-kommýnıkatsııalyq tehnologııalar jáne aqparattyq qaýipsizdikti qamtamasyz etý salasynda áskerı kadrlardy daıarlaýǵa arnalǵan Halyqaralyq ister, qorǵanys jáne qaýipsizdik komıtetiniń otyrysy ótti. Bul týraly palatanyń baspasóz qyzmetinen málim etti.

Komıtet tóraǵasy Muhtar Erman aqparattyq-kommýnıkatsııalyq tehnologııalar men aqparattyq qaýipsizdikti qamtamasyz etý salasynda áskerı kadrlardy daıarlaý Kıberqaýipsizdik tujyrymdamasy (Qazaqstannyń Kıberqalqany) men Elbasynyń tapsyrmalaryn iske asyrýdyń mańyzdy bóligi ekenin aıtty.

Taqyryp boıynsha Qorǵanys mınıstriniń orynbasary Mýslım Altynbaev baıandama jasady. Al Qorǵanys mınıstrliginiń Radıoelektronıka jáne baılanys áskerı-ınjenerlik ınstıtýty Aqparattyq qaýipsizdik kafedrasynyń bastyǵy Andreı Kocheshkov bolashaq ofıtserlerdi daıyndaý boıynsha oqý protsesiniń, áskerı oqý ornynyń ádistemelik jáne materıaldyq-tehnıkalyq turǵydan jabdyqtalýynyń erekshelikteri, sonymen qatar oqytýshy quramynyń deńgeıi jóninde habardar etti.

Talqylaý barysynda kıberqaýipsizdik salasyndaǵy zamanaýı qaýipter men qaterlerge oqý baǵdarlamalaryn daǵdylaý, ozyq jabdyqtar men baǵdarlamalyq ónimdermen qamtamasyz etý qajettiligi, álemniń jetekshi áskerı mekemelerine áskerı mamandar men kýrsanttardy tájirıbe almasý úshin jiberýge qatysty sheshimin tappaǵan máseleler áńgime ózegine aınaldy.

Sharaǵa Májilis depýtattary, Qorǵanys, Tsıfrlyq damý, qorǵanys jáne aeroǵarysh ónerkásibi, Bilim jáne ǵylym mınıstrlikteri, Ulttyq qaýipsizdik komıteti, áskerı jáne azamattyq joǵarǵy oqý oryndary mamandandyrylǵan fakýltetteriniń basshylary qatysty.