Májiliste Keden odaǵynda tarıftik emes retteý sharalaryna qatysty zań jobasy tanystyryldy
Ekonomıkalyq damý jáne saýda vıtse-mınıstri Mádına Ábilqasymovanyń aıtýynsha, ulttyq zańnamany Keden odaǵynyń kelisimderi men halyqaralyq normalaryna sáıkestendirý saýda salasyndaǵy memleketimizdiń mańyzdy baǵyttarynyń biri bolyp tabylady. Soǵan oraı, Májiliste tanystyrylǵan zań jobasynyń basty maqsaty qoldanystaǵy zańnamalardy Qazaqstan qol qoıǵan halyqaralyq kelisimdermen sáıkestendirý bolyp otyr. Bul rette Qazaqstannyń 9 zańnamalyq aktilerine ózgerister men tolyqtyrýlar engizý kózdeledi. Atap aıtqanda, QR Ekologııalyq kodeksine, Salyq kodeksine, Halyq densaýlyǵy jáne densaýlyq saqtaý júıesi týraly kodekske, «QR Іshki ister organdary týraly» zańyna, «Jekelegen qarý túrleriniń aınalymyna memlekettik baqylaý jasaý týraly» zańyna ózgerister engizý kózdelip otyr. Sonymen qatar, «Lıtsenzııa týraly» zańnamaǵa da ózgerister engizý qarastyrylǵan. Mysaly, ozon qabatyn buzatyn jáne quramynda olar bar ónimderdi, qaýipti qaldyqtardy ákelýge, áketýge lıtsenzııalaý engiziledi. Sonymen qatar, adam aǵzalaryn (aǵza bólikterin), adamnyń tinderin, qany men onyń komponentterin ákelýge, áketýge lıtsenzııa kózdeledi. Azamattyq jáne qyzmettik qarý men onyń patrondaryn, jarylǵysh materıaldardy, pırotehnıkalyq zattardy ákelý, áketý tártibi aıqyndalady.
«Zań jobasyn qabyldaý Keden odaǵy sheńberinde qabyldanǵan mindettemelerdi oryndaýǵa yqpal etedi. Tarıftik emes retteý sharalaryn qoldaný bóliginde úshinshi elderge qatysty biryńǵaı syrtqy saýda saıasaty júrgiziledi. Jalpy, qujat qabyldansa áleýmettik-eonomıkalyq saldary oń bolady dep kútilýde», - deıdi M. Ábilqasymova.