Májiliste «Qazaqstan halqy Assambleıasy» depýtattyq tobynyń kezekti otyrysy ótti

ASTANA. 2 sáýir. QazAqparat - Búgin Parlament Májilisinde «Qazaqstan halqy Assambleıasy» depýtattyq tobynyń kezekti otyrysy ótti. Onda Elbasy - Qazaqstan halqy Assambleıasynyń tóraǵasy Nursultan Nazarbaevtyń Qazaqstan halqy Assambleıasynyń XIX sessııasynda júktegen áleýmettik baǵdarlamalardy júzege asyrýǵa etnomádenı ortalyqtardyń qatysýlary jónindegi tapsyrmanyń oryndalý barysy talqylandy. Bul týraly Májilistiń baspasóz qyzmetinen habarlandy.

Jıynda Astana qalasy jáne Aqmola oblysy boıynsha nemisterdiń «Qaıta órleý» etno-mádenı ortalyǵy birlestiginiń tóraǵasy I. Berd kún tártibindegi másele boıynsha baıandama jasady. Onyń sózine qaraǵanda, Aqmola oblysynyń 8 aýdanynda áleýmettik baǵyttaǵy baǵdarlamany júzege asyratyn «Áleýmettik teatr» jumys isteıdi. Mádenı ortalyqtyń jastar qanatynyń bastamasymen áleýmettik-ekologııalyq baǵyttaǵy baǵdarlamalar júzege asyrylýda. Al etnolıngvıstıkalyq lagerlerde qazaq tili oqytylyp jatyr.

Óz kezeginde Májilis depýtaty, «Qazaqstan halqy Assambleıasy» depýtattyq tobynyń múshesi ıÝrıı Tımoshenko kásipkerler qaýymdastyǵynyń jumysy týraly baıandady. Onyń aıtýynsha, Qazaqstan halqy Assambleıasy Hatshylyǵynyń aıasynda kásipkerlerdiń forýmy ótkizildi. Búginde Qazaqstan halqy Assambleıasynyń 8 jobasy iske asyrylyp jatyr. Al aýyl sharýashylyǵy, mashınaqurylys jáne qurylys salalaryna baǵyttalǵan 60 jobamen kelisim jasalýda.