Májiliste «Ǵarysh qyzmeti týraly» zań jobasynyń tanystyrylymy ótti
Májilis depýtattary men elimizdiń birqatar memlekettik organ ókilderi qatysqan basqosýda jańa zań jobasyna qatysty Ulttyq ǵarysh agenttigi tóraǵasynyń orynbasary Meıirbek Moldabekov baıandama jasady. Onyń sózine qaraǵanda, 2007 jyldyń naýryz aıynda Memleket basshysy Nursultan Nazarbaevtyń Jarlyǵyna sáıkes, Ulttyq ǵarysh agenttigi quryldy. «Bul Qazaqstannyń ǵarysh qyzmetiniń damýynda sapaly jańa kezeńdi belgiledi. Qazǵarysh úsh jyldyń ishinde Qazaqstannyń ǵarysh qyzmetiniń strategııasyn ázirlep, Memleket basshysy men Úkimettiń jan-jaqty qoldaýy arqyly elimizde jańa ǵarysh salasyn qurýǵa, ekonomıkanyń ǵylymdy qajetsinetin joǵary tehnologııaly sektoryn qalyptastyrýǵa baǵyttalǵan jobalardy iske asyrýda»,- dedi Agenttik tóraǵasynyń orynbasary.
Onyń sózine qaraǵanda, ǵarysh qyzmeti damýynyń strategııalyq baǵyttary Qazaqstan Respýblıkasynyń údemeli ındýstrııalyq-ınnovatsııalyq damytý jónindegi memlekettik baǵdarlamasyna jáne «Qazaqstan Respýblıkasynda 2010-2014 jyldarǵa arnalǵan ǵarysh qyzmetiniń damýy» salalyq baǵdarlamasyna engizilgen. «Salalyq baǵdarlamanyń maqsaty - tolyqqandy ǵarysh salasyn qurýdyń birinshi kezeńin iske asyrý bolyp tabylady. Oǵan sáıkes, «KazSat-2» jáne «KazSat-3» baılanys jáne aqparat taratý júıesin qurý, Jerdi qashyqtyqtan zondtaýdyń ǵaryshtyq júıesin qurý, «Baıqońyr» ǵarysh aılaǵynda «Báıterek» ǵarysh zymyran keshenin qurý, ǵarysh apparattaryn qurastyrý-synaý keshenin qurý sııaqty elimizdiń Indýstrııalandyrý kartasyna engizilgen 4 jobany iske asyrý bolyp tabylady», -dedi M.Moldabekov.
Onyń aıtýynsha, zań kúshine ense, ol elimizdiń áleýmettik-ekonomıkalyq damýyn jedeldetip, osy úderiste ǵarysh qyzmetiniń úlesin ulǵaıtady. Sondaı-aq ǵarysh qyzmeti salasyndaǵy qoǵamdyq qatynastardy quqyqtyq retteýdi júıeleýge múmkindik beredi.