Májiliste azamattar ótinishin qaraý boıynsha memorgandar jumysynyń nátıjesi baıandalady

NUR-SULTAN. QazAqparat - Búgin Májilis spıkeri Erlan Qoshanovtyń tóraǵalyǵymen Bıýro otyrysy ótip, onda aldaǵy jalpy otyrystyń kún tártibi jobasy naqtylandy, dep habarlaıdy QazAqparat.

Bıýro otyrysynda depýtattardyń bastamasymen ázirlengen atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly zań jobasyn birinshi oqylymda qaraý usynyldy. Qujat atqarýshylyq is júrgizý máseleleri jónindegi zańnamalyq aktilerdegi olqylyqtardy, qaıshylyqtar men sybaılas jemqorlyqqa yqpal etetin normalardy joıýdy kózdeıdi.

Sonymen qatar Májilis depýtattary óńirlerde ótken halyqpen kezdesýler barysynda kelip túsken azamattardyń ótinishterin memlekettik organdardyń qaraý nátıjeleri boıynsha Premer-Mınıstrdiń orynbasary Eraly Toǵjanovty tyńdap, atalǵan máselelerdi talqylaıtyn bolady.

Palatanyń aldaǵy jalpy otyrysynda TMD memleketteri úkimetteriniń arasyndaǵy kelisilgen salyq saıasatynyń qaǵıdattary týraly kelisimniń qoldanysyn toqtatý týraly hattamany ratıfıkatsııalaý týraly, sondaı-aq azamattyq zańnamany jetildirý máseleleri boıynsha túzetýler engizý týraly zań jobalaryn jumysqa alý josparlanyp otyr.